У Маларыце незалежнай журналістцы перашкаджалі рабіць фотаздымкі ў судзе

Як распавяла Мілана Хатытонава службе маніторынгу ГА “Беларуская асацыяцыя журналістаў”, яна звярнулася да выконваючага абавязкі старшыні суда Сяргея Маручыка (ён веў гэты працэс), каб атрымаць дазвол на фота і відэазапіс падчас працэсу. Суддзя азнаёміўся з журналісцкім пасведчаннем і паведаміў, што на пачатку пасяджэння спытае згоду ва ўсіх бакоў і вырашыць гэтае пытанне.

“Падчас працэсу пракурор і пацярпелы выказаліся супраць, таму суддзя не дазволіў здымаць працэс, але пры гэтым сам адзначыў, што ў перапынку і пасля заканчэння пасяджэння здымаць дазволена, бо забараніць гэта ён не можа, калі толькі не супраць будзе старшыня канвою, — кажа Мілана Харытонава. — Старшыня канвою ніяк не адрэагаваў на гэтыя словы, але ў перапынку забараніў мне рабіць здымкі абвінавачанага фермера, нягледзячы на тое, што сам Аляксандр Бяльчук быў не супраць”.

Паводле журналісткі, іншыя прадстаўнікі канвою таксама заміналі здымаць, спрабавалі закрыць абвінавачанага ад камеры і зачыніліся ў зале суда падчас перапынку.

“Я да апошняга спрабавала дамовіцца з гэтым канвоем, каб зрабіць здымкі, — працягвае Мілана Харытонава. — Прапаноўвала кампраміс — не буду здымаць супрацоўнікаў міліцыі, а толькі абвінавачанага. Але старшыня канвою паведаміў мне, што тэлефанаваў ва ўпраўленне ўнутраных спраў Брэсцкага аблвыканкама, дзе атрымаў адпаведныя інструкцыі, і што ён нават не можа мне паведаміць сваё прозвішча, бо падчас транспарціроўкі абвінавачанага “выконвае баявую задачу”. Увогуле склалася ўражанне, што канвой больш сачыў за мной, чым за абвінавачаным”.