У Глыбокім зноў судзілі журналіста-фрылансера за прафесійную дзейнасць

Гэтым разам падставай для адміністрацыйнага пераследу стаў сюжэт на спадарожнікавым тэлеканале “Белсат” пад назвай “На Віцебшчыне паставілі помнік камсамолу”. Журналіста абвінавацілі ў парушэнні артыкула 35 “Закона аб СМІ” (праца на замежны сродак інфармацыі без акрэдытацыі пры беларускім МЗС) і прыцягнулі да адказнасці па частцы 2 артыкула 22.9 Кодэкса аб адміністратцыйных правапарушэннях — за незаконны выраб і распаўсюд прадукцыі СМІ.

Па словах журналіста, ніякага спадзёву наконт апраўдальнага рашэння па выніках судовага слухання ў яго не было, бо тэма сюжэта значная для чыноўнікаў.

Рабіць фотаздымкі ў ходзе слухання суддзя Тарасевіч забараніў. На прапанову журналіста ў Міжнародны дзень роднай мовы весці судовы працэс па-беларуску, суддзя адказаў, што Лупач можа гаварыць на беларускай мове, а сам, спаслаўшыся на дзяржаўнае двухмоўе, гаварыў па-руску.

У якасці сведкі  на судзе прысутнічала Святлана Палідавец, якая працуе настаўніцай у адной са школ горада. Яна зазначыла: пасля наведвання міліцыі зразумела, што размаўляць з журналістамі нельга, і больш нікому ніякіх інтэрв’ю даваць не будзе.

Перад судовым пасяджэннем Зміцер Лупач перадаў у Глыбоцкі суд арыгінал квітанцыі аб аплаце папярэдняга штрафу. Дакумент гэтым разам павялічанага памеру: 1.8 х 1.6 метра. “Бо,  – кажа журналіст, – часам у судзе не могуць адсачыць, ці заплаціў я штраф, і перадаюць паперы судовым выканаўцам”.  

– Думаю, што праверыць гэта нескладана, але яны прызвычаіліся, каб я сам прыносіў квітанцыю,сплаціўшы вялікі штраф. То бок ідзі вешацца і вазьмі з дому сваю вяроўку. А вось суд позву мне не дасылае, спасылаецца на ХХI стагоддзе і век інтэрнэту, маўляў, можна паведамляць любымі сродкамі сувязі.  Міліцыя хоць праз Viber шле сфатаграфаваную позву.

Чаму тады працаўнікі суда ў век інтэрнэту не могуць спраўдзіць, ці заплаціў я штраф? Мінулым разам я прыносіў больш за 130 квітанцый аб аплаце штрафу, а зараз вырашыў прынесці вось такі вялікі дакумент, каб ужо дакладна ўбачылі”, — тлумачыць Зміцер Лупач.

Гэта першы суд над Змітром Лупачам у 2019 годзе. Летась журналіст-фрылансер па артыкуле 22.9 КаАП прыцягваўся да адказнасці дзевяць разоў. Агулам ён сплаціў штрафаў на суму 4 802 беларускія рублі.