У Беластоку прэзентуюць кнігу беларускага журналіста з Падляшша

Кніга журналіста і пісьменніка беларуска-польскага памежжа Міхала Андрасюка «Żubr i inne opowiada­nia» — першая з выдавецкай ініцыятывы Цэнтра беларускай культуры ў Беластоку. 

22 кастрычніка ў Беластоку адбудзецца прэзентацыя кнігі беларускага журналіста з Падляшша Міхала Андрасюка. У ёй адлюстраванае жыццё польскай правінцыі на беларуска-польскім памежжы.

Міхал Андрасюк — журналіст, актыўны дзеяч беларускай меншасці ў Польшчы, аўтар шматлікіх апавяданняў і раманаў. Жыве ў Гайнаўцы і вёсцы Вoйнаўка на польска-беларускім памежжы, піша па-беларуску і па-польску. Лаўрэат 2‑й прэміі імя Ежы Гедройца ў 2019 годзе за кнігу «Поўня».

«Żubr i inne opowiada­nia» — зборнік апавяданняў, куды ўвайшлі апавяданні з беларускамоўных кніг «Мясцовая гравітацыя» і «Фірма». Гэтыя творы ўпершыню перакладзеныя з беларускай на польскую мову.

«Польская версія кнігі аўтара беларуска-польскага памежжа дазволіць папулярызаваць беларускую культуру і літаратуру сярод польскіх чытачоў», — упэўнена выдавецтва.

Пераклад на польскую мову зрабіў Марцін Рэмбач у рамках праекта, фінансаванага з бюджэту горада Беласток.

Тутэйшы Цэнтр беларускай культуры — гэта новая ўстанова Падляскага ваяводства, мэтай якога з’яўляецца распаўсюд і папулярызацыя беларускай культуры і гісторыі.