У Беларусі анулявалі даменнае імя TUT.by

Як распавяла на сваёй старонцы ў Face­book Яўгенія Чарняўская, усё адбылося за паўтара тыдня ў аднабаковым парадку без варыянтаў рашэння.

«Ну, гэта значыць з варыянтам, вядома — «з’явіцца асабіста ў офіс рэгістратара для ўхілення парушэнняў». Варыянт перадаць пашпарт і адправіць чалавека з даверанасцю для зверкі пашпартных звестак, беларускім уладам не падышоў.

Яны вельмі хацелі мяне бачыць асабіста. Засумавалі! Ложак у СІЗА вызваляць, час на допыты выдзеляць у прайм-тайм.

Парушэннем паслужылі няправільныя дадзеныя майго пашпарта, даты нараджэння, якія раптоўна змяніліся ў маім асабістым кабінеце hoster.by на няправільныя.

Пры маёй спробе змяніць іх у асабістым кабінеце на сайце хостэра, дадзеныя зноў ператвараліся ў няправільныя. Цуды нейкія!

Я паспрабавала паперапісвацца са службай падтрымкі. Але ніякай, уласна, падтрымкі не атрымала.

Hoster.by проста паслухмяна выканаў загад ААЦ КДБ. Але я да іх прэтэнзій не маю: яны ў Беларусі, ім страшна, яны мусяць выконваць загады ўладаў. Кат ёсць кат, ён працуе пры двары і не смее не паслухацца. Праўда, не асуджаю, сітуацыя далікатная», — распавяла пра ход справы спадарыня Чарняўская.

Нагадаем,TUT.BY існаваў амаль 22 гады і быў самым папулярным сродкам масавай інфармацыі краіны. У красавіку 2021 года TUT.BY ахопліваў 63% беларускай аўдыторыі інтэрнета. Штодня 3,3 млн чалавек — а гэта кожны трэці жыхар Беларусі — заходзілі на партал. Але ўжо праз месяц найбуйнейшае недзяржаўнае медыя краіны было разгромлена, сайт — заблакаваны, 15 супрацоўнікаў апынуліся за кратамі. У выніку галоўная рэдактарка Марына Золатава і дырэктарка Людміла Чэкіна атрымалі па 12 гадоў пазвалення волі.

Чытайце яшчэ:

TUT.BY: как появилось и как было разгромлено главное медиа в Беларуси

«Калі ў хату ніхто не пагрукаў, на сёння і гэта вялікі пазітыў!» Калегі ў Беларусі пра адыходзячы год, мары, надзеі і пачуцці

Cёння спаўняецца 45 гадоў журналісту Андрэю Кузнечыку. З іх апошнія два — палітвязень за кратамі