Тэлерадыёкампанія “Брэст” прапануе палітычным партыям за свой кошт стварыць цыкл перадач

Нагадаем, што брэсцкія сацыял-дэмакраты звярнуліся да кіраўніцтва мясцовай тэлерадыёкампаніі з прапановай арганізаваць цыкл перадач з удзелам прадстаўнікоў палітычных партый (уключаючы БСДП) і грамадскіх арганізацый на актуальныя тэмы.

У лісце за подпісам Ларысы Дабрадомавай гаворыцца, што асноўнай мэтай дзейнасці ТРК “Брэст” з’яўляецца атрыманне прыбытку. Пры гэтым кіраўнік прадпрыемства паведамляе, што ў адпаведнасці са статутам РУПТЦ “Тэлерадыёкампанія “Брэст” — гэта самастойны гаспадарчы суб’ект, які ажыццяўляе сваю дзейнасць на прынцыпах гаспадарчага разліку і не мае крыніцаў фінансавання з мясцовага альбо рэспубліканскага бюджэта.

“У адказе таксама сцвярджаецца, што мясцовая тэлерадыёкампанія не з’яўляецца рэгіянальным структурным падраздзяленнем Нацыянальнай дзяржаўнай тэлерадыёкампаніі, — каментуе ліст кіраўніка мясцовага тэлебачання старшыня Брэсцкай абласной арганізацыі БСДП Ігар Маслоўскі. — У той жа час сайт РУПТЦ “Тэлерадыёкампанія” “Брэст” інфармуе пра адваротнае. Атрымліваецца, што хтосьці кажа няпраўду альбо мае месца тэхнічная памылка?”

Па словах палітыка, у адказе можна знайсці і пазітыў.

— Па-першае, мы цяпер ведаем, што патрэбныя грошы на “распрацоўку канцэпцыі, напісанне сцэнарыя, распрацоўку дызайну студыі, выраб афармлення студыі ў адпаведнасці з зацверджаным заказчыкам дызайнам, графічнае афармленне тэлепраграм, здымкі, мантаж, выдачу ў эфір і іншае”, — адзначае Маслоўскі. — У гэтым выпадку, а таксама пры адпаведнасці канцэпцыі цыклу тэлеперадач канцэпцыі вяшчання тэлеканала “Беларусь 4. Брэст”, дырэкцыя мясцовага тэлебачання гатовая прыступіць да перамоваў па рэалізацыі нашага прапановы. Па-другое, грошы падаткаплацельшчыкаў на мясцовае тэлебачаньне не трацяцца. Прынамсі, так сцвярджаецца ў афіцыйным адказе РУПТЦ “Тэлерадыёкампанія” “Брэст”.

Цяпер, дадае Ігар Маслоўскі, засталося высветліць, каму ж належыць і падпарадкоўваецца абласное тэлебачанне.