Супольная пазіцыя беларускіх праваабаронцаў напярэдадні чарговага раунда Дыялога па правах чалавека ЕС — Беларусь

Мы канстатуем адсутнасць істотнага прагрэсу і сістэмных зменаў у галіне правоў і свабодаў чалавека ў Беларусі.

У краіне дагэтуль:

• захоўваецца і ўжываецца смяротнае пакаранне;
• ігнаруюцца важныя рэкамендацыі міжнародных органаў па ўмацаванні судовай сістэмы;
• істотна абмяжоўваюцца грамадзянскія, палітычныя і сацыяльна-эканамічныя правы, у тым ліку свабода асацыяцый, свабода выказвання меркаванняў, свабода сходаў;
• ёсць факты пераследу праваабаронцаў і журналістаў за іх прафесійную дзейнасць.

Сур’ёзнае паляпшэнне сітуацыі магчымае толькі ў выніку сістэмных зменаў у галіне правоў і свабодаў  чалавека і пры выбудоўванні каштоўнаснага дыялогу як паміж Беларуссю і міжнароднымі партнёрамі, так і – і нават у першую чаргу – унутры краіны.

Беларуская праваабарончая супольнасць мусіць стаць суб’ектам Дыялога па правах чалавека ЕС — Беларусь і быць уключаная ў гэты працэс.

Беларускія праваабарончыя арганізацыі мусяць быць уключаныя таксама і ў іншыя дыялогавыя працэсы ўнутры краіны. У сувязі з гэтым мы заклікаем урад наладзіць дыялог у галіне правоў чалавека паміж дзяржаўнымі інстытутамі і праваабарончымі арганізацыямі і ва ўзгадненні з імі распрацаваць Нацыянальны план па правах чалавека. Асновай гэтага плана могуць стаць рэкамендацыі, якія Рэспубліка Беларусь атрымала ў рамках працэдуры Універсальнага перыядычнага агляду. Праваабарончыя арганізацыі супольна распрацоўваюць індыкатары выканання гэтых рэкамендацый, якія дазволяць ацаніць змены ў сітуацыі з правамі чалавека ў Рэспубліцы Беларусь.

Мы таксама заклікаем урад няўхільна выконваць міжнародныя абавязальніцтвы, добраахвотна прынятыя на сябе Рэспублікай Беларусь у рамках ААН, АБСЕ, іншых міжнародных структураў і механізмаў, і прыняць меры па імплементацыі заключэнняў створаных у іх рамках дагаворных органаў, у прыватнасці Камітэта па правах чалавека ААН.

АУ «Офіс па правах людзей з інваліднасцю»
АУ «Цэнтр прававой трансфармацыі»
Беларускі дакументацыйны цэнтр
Беларускі дом правоў чалавека імя Барыса Звозскава
ГА «Беларуская асацыяцыя журналістаў»
Праваабарончы цэнтр «Вясна»
РГА «Прававая ініцыятыва»
РПГА «Беларускі Хельсінкскі камітэт»
Таварыства «Ініцыятыва Forb»