Суд у Магілёве стаў на бок журналіста

Суд Ленінскага раёна Магілёва прызнаў няпоўнай праверку па скарзе Уладзіміра Лапцэвіча, якога чыноўнік Кісцянёў не пусціў на сход сябраў гаражнага кааператыва «Спадарожнік-2008», а потым адмовіўся выдаць кнігу заўваг і прапаноў.

19 траўня ў судзе Ленінскага раёна суддзя Ірына Ланчава разгледзела скаргу журналіста Уладзіміра Лапцэвіча на спыненне працэсу аб адміністрацыйным правапарушэнні.

Нагадаем, чыноўнік аддзела жыллёва-камунальнай гаспадаркі і добраўпарадкавання адміністрацыі Ленінскага раёна Канстанцін Кісцянёў 29 красавіка адмовіўся пусціць журналіста ў залу на ініцыяваны адміністрацыяй сход чальцоў гаражнага кааператыва “Спадарожнік-2008”. Журналіста на сход запрасілі чальцы кааператыва. Калі Лапцэвіч у адказ запатрабаваў кнігу заўваг і прапаноў, чыноўнік адмовіўся яе прадставіць.

Лапцэвіч выклікаў нарад міліцыі. Участковы Ганчаронак, які прыйшоў па выкліку, склаў пратакол, апытаў журналіста і сыйшоў, не паразмаўляўшы са сведкамі канфлікта.

13 мая журналіст атрымаў пастанову Ленінскага РАУС аб спыненні справы аб адміністрацыйным правапарушэнні — нявыдачы кнігі заўваг і прапаноў па першым патрабаванні. Сутнасць пастановы зводзілася да таго, што адміністрацыя ўжо не працавала ў час правядзення сходу, і Лапцэвіч, як яму раіў Кісцянёў, мусіў прыходзіць у наступны працоўны дзень, а гэта 2 мая, каб мець магчымасць атрымаць кнігу. Журналіст не пагадзіўся з гэтым і падаў скаргу ў суд.

У судзе Лапцэвіч здолеў давесці, што ўчастковы інспектар міліцыі Ганчаронак правёў праверку па яго заяве няпоўна, у сувязі з чым склаў неправамерную пастанову аб спыненні справы аб адміністрацыйным правапарушэнні. У сваім выступе ў судзе Уладзімір Лапцэвіч таксама казаў пра тое, што рапарт Ганчаронка ўтрымлівае ілжывыя сцверджанні, і нават супярэчыць пратаколу апытання Кісцянёва.

Суддзя Ірына Ланчава па выніках разгляду скаргі прызнала правату журналіста і пастанавіла аднавіць адміністрацыйны працэс, паколькі ўчастковы Ганчаронак не апытаў належным чынам Канстанціна Кісцянёва, не апытаў сведак і не даў ацэнку паказанням журналіста і чыноўніка. Матэрыялы адміністрацыйнай справы у адносінах Кісцянёва накіраваныя ў Ленінскі РАУС г. Магілёва на новую праверку.