Суд над Пальчысам можа скончыцца ўжо на гэтым тыдні

У панядзелак перад будынкам суда ізноў працягнулася акцыя з патрабаваннем спыніць крымінальную справу і вызваліць Пальчыса. Шасцёра актывістаў, у тым ліку Павел Севярынец, Зміцер Дашкевіч, Аляксандр Макаеў і іншыя разгарнулі бел-чырвона-белыя сцягі і працягваюць скандаваць лозунгі.

Супрацоўнікі міліцыі склалі на ўсіх актывістаў адміністрацыйныя пратаколы па артыкуле 23.34 КаАП за незаконнае пікетаванне.

Разам з тым жонка Пальчыса Вікторыя не выключае, што працэс, які праходзіць у закрытым рэжыме, можа скончыцца ўжо на гэтым тыдні. Калі Эдуарда суд прызнае вінаватым, яму пагражае да 5 год пазбаўлення волі.

Беларускія і міжнародныя праваабарончыя арганізацыі называюць рэдактара сайта 1863x.com палітычным вязнем і настойваюць на яго вызваленні.

Нагадаем, што Пальчыс абвінавачваецца ў распальванні варожасці па прыкмеце расавай, нацыянальнай, рэлігійнай, моўнай ці іншай сацыяльнай прыналежнасці (ч. 1 арт. 130 КК), а таксама ў вырабе і распаўсюджванні парнаграфічных матэрыялаў або прадметаў парнаграфічнага характару (арт. 343 КК).