Мне вельмі прыемна атрымаць такую рэдкую кнігу! — вазочнік Антон Анішчук атрымаў падарунак да Дня народзінаў

У падарунак Антону прывезлі з офіса ГА «БАЖ» кнігу пра беларускую альтэрнатыўную музыку  “222 альбомы беларускага року і ня толькі» аўтарства знаных музычных журналістаў Вітаўта Мартыненкі і Анатоля Мяльгуя.

Меламан быў вельмі ўсцешаны такім падарункам:

— Мне вельмі прыемна атрымаць такі рарытэтны падарунак. Для мяне асабіста імёны гэтых аўтараў — Вітаўта Мартыненкі і Анатоля Мяльгуя — не пусты гук, я даўно пра іх ведаю. Яны ў далёкім 1989 годзе выпусцілі зборнік сваіх артыкулаў «Праз рок-прызму», які стаў першай беларускай рок-энцыклапедыяй і цяпер з’яўляецца букіністычнай рэдкасцю. Ды што казаць, гэта была першая рок-энцыклапедыя на прасторах СССР, бо знакаміты рускамоўны зборнік «Back in The USSR» Арцемія Троіцкага быў выдадзены пазней.

“222 альбомы беларускага року…” — другі зборнік артыкулаў легендарных беларускіх музычных журналістаў, якія, на жаль, пакінулі гэты свет. Гэтая кніга стала першым адмысловым літаратурна-музычным экспанатам у маёй хатняй бібліятэцы.

Хачу падзякаваць усім, хто маё дачыненні да гэтага крутога падарунка — і Віталю Супрановічу, з падтрымкай якога кніга выйшла ў свет, і бажаўцам, дзякуючы якім я атрымаў гэтую рэдкую кнігу!