Спецдакладчык ААН: У Беларусі немагчымая незалежнасць СМІ

Паводле інфармацыі Цэнтра прававой трансфармацыі, акрамя высноў даклад утрымлівае рэкамендацыі, якія маюць на мэце падтрымаць Беларусь у справе выканання як свабоды выказвання меркаванняў, замацаванай у Канстытуцыі краіны, так і яе міжнародных абавязацельстваў. «Зробленыя ў дакладзе высновы ўказваюць на тое, што ўстаноўленая за апошнія два дзесяцігоддзі сістэма кіравання сродкамі масавай інфармацыі фактычна ўдушыла ажыццяўленне права на свабоду меркаванняў і інфармацыю», — зазначаецца ў паведамленні цэнтра.

Асноўныя высновы Харасці: плюралізм сродкаў масавай інфармацыі адсутнічае; Беларусь з’яўляецца адзінай у Еўропе краінай, дзе няма прыватных кампаній агульнанацыянальнага вяшчання; урад выступае ў ролі прамога рэгулятара ўсіх відаў сродкаў масавай інфармацыі; крытычныя выказванні і расследаванні спыняюцца праз крыміналізацыю зместу, які разглядаецца як «шкодны для дзяржавы», праз злачынную дыфамацыю і законы аб нанясенні знявагі, якія абараняюць дзяржаўных службовых асоб, і ў прыватнасці прэзідэнта, ад кантролю з боку грамадскасці.

Агульнасістэмныя парушэнні права на свабоду меркаванняў узмацняюцца сістэматычным пераследам журналістаў, якія супрацьстаяць адмове ў ажыццяўленні іх правоў, адзначае спецдакладчык ААН. Асаблівую трывогу ў гэтай сувязі выклікае прыняцце ў снежні 2014 года паправак да закона аб СМІ, бо папраўкі тычацца апошняга апірышчы свабоднага выказвання меркаванняў — інтэрнэта.

Поўны тэкст даклада (па-руску)