Родным журналіста Дзяніса Івашына пагражаюць за распаўсюд інфармацыі пра яго

Пра гэта паведаміла жонка журналіста Вольга Івашына: ёй і бацькам Дзяніса перадаюць пагрозы і «просьбы» з патрабаваннем перастаць пісаць пра яго.

У адваротным выпадку супрацоўнікі магілёўскай папраўчай калоніі №15, дзе зараз адбывае зняволенне журналіст, пагражаюць пазбавіць яго тэлефанаванняў, лістоў і спатканняў нават з адвакатам, а таксама змясціць журналіста ў штрафны ізалятар ці памяшканне камернага тыпу.

Аднаго доўгатэрміновага і некалькіх кароткатэрміновых спатканняў Дзяніса ўжо пазбавілі, гэта здарылася адразу пасля этапавання яго ў Магілёў.

Родныя журналіста ўспрынялі пагрозы цалкам сурʼёзна, але паддавацца на шантаж не збіраюцца.

«Мы абсалютна сур’ёзна ставімся да такіх пагрозаў, тым больш, што пра падобныя ўльтыматумы кажуць і іншыя сваякі палітвязьняў. <…> Але ў такіх умовах пагаджацца на запалохваньне — значыцца даваць ім у рукі інструмант для далейшага шантажу й ціску. Таму хай не спадзяюцца, калі мелі такі намер», — паведамляе Вольга Івашына.

Дзяніс Івашын — карэспандэнт газеты «Новы Час», беларускі рэдактар валанцёрскай супольнасці Inform­Na­palm. Яго затрымалі супрацоўнікі КДБ 12 сакавіка 2021 года: спачатку выставілі абвінавачанне паводле арт. 365 Крымінальнага кодэкса (умяшанне ў дзейнасць супрацоўнікаў органаў унутраных спраў), а пазней дадалі яшчэ і «здраду дзяржаве». Верагодна, «апошняй кропляй» стала аўтарскае расследаванне пра былых украінскіх сілавікоў, што ўладкаваліся на працу ў беларускі АМАП. Журналіста схапілі літаральна на наступны дзень, як ён даў інтэрв’ю пра гэта незалежнаму тэлеканалу «Настоящее время».

Суд над Дзянісам Івашыным доўжыўся амаль месяц у Гродзенскім абласным судзе і адбываўся ў закрытым рэжыме. 14 верасня 2022 года суддзя Валерый Раманоўскі асудзіў журналіста да 13 гадоў і 1 месяц зняволення ў калоніі ўзмоцненага рэжыму і штрафу ў памеры 4800 рублёў. Апроч гэтага, Івашын мусіць выплаціць кампенсацыю маральнай шкоды дзевяці пацярпелым сілавікам — агулам 22 800 беларускіх рублёў. Пры канцы мінулага года 20 снежня Вярхоўны суд Беларусі разглядзеў апеляцыйную скаргу на прысуд палітзняволенаму гродзенскаму журналісту і пакінуў вырак першай інстанцыі без задавальнення. Сёлета напрыканцы студзеня Дзяніса Івашына этапавалі з турмы №1 Гродна ў папраўчую калонію №15 Магілёва, дзе для яго прадугледжаны «ўзмоцнены рэжым» адбыцця пакарання.

Чытайце яшчэ:

Дзіяна Флеер. Пра тое, як верыць у сябе і ўмець знаходзіць новыя магчымасці ў эміграцыі

Найлепшыя беларускія інстачасопісы

Ласма Антоневича: Журналисты из Беларуси демонстрируют энтузиазм, но их слабая сторона — неверие в собственные проекты