Рэдактара «Витебского курьера news» Аляксандра Корнышава аштрафавалі за рэпосты са свайго ж выдання

Рэдактара рэгіянальнага анлайн-выдання «Витебский курьер news» прызналі вінаватым у распаўсюдзе інфармацыйнай прадукцыі, уключанай у Рэспубліканскі спіс экстрэмісцкіх матэрыялаў. Адміністрацыйную справу паводле часткі 2 артыкула 19.11 КаАП суддзя Першамайскага раёна Віцебска Вераніка Барысава разглядала ў адсутнасць адказчыка — у лістападзе 2020 года Корнышаў вымушана з’ехаў з Беларусі.

Аляксандр Корнышаў. Скрыншот відэа

У судзе разбіралі адразу два адміністрацыйныя пратаколы — ад 30 красавіка і ад 13 траўня. Іх змест практычна аднолькавы: міліцыянты з Першамайскага РАУС Віцебска заўважылі некалькі спасылак на «Витебский курьер news», размешчаных у «ВКонтакте» на асабістай старонцы рэдактара выдання. Складзеныя пратаколы Аляксандру Корнышаву даслалі таксама праз гэтую сацыяльую сетку ў асабістых паведамленнях, бо выклікаць яго ў пастарунак не атрымалася.

 «Выклікаў у суд было таксама два, на 16 і на 20 траўня. Гэтыя даты прызначыла міліцыя, але ў раскладзе судовых пасяджэнняў майго прозвішча ні на адну, ні на другую дату не было», — распавёў Аляксандр Корнышаў.

Судовы працэс у выніку адбыўся 20 траўня і скончыўся штрафам памерам 20 базавых велічынь (800 BYN), на аплату якога дадзены адзін месяц. 

Праз тры дні пасля суду міліцыянты прыходзілі з ператрусам па месцы рэгістрацыі рэдактара. Іх цікавіла, як даўно Корнышаў займаецца журналістыкай, пра што піша, як фінансуецца і дзейнічае «Витебский курьер news». Паводле Аляксандра Корнышава, падобныя візіты пасля ягонага ад’езду з Беларусі здараліся і раней. Але рэгулярны характар набылі з тае пары, як сёлета ў лютым журналіст узяў удзел у праграме «Беларус беларусу» на тэлеканале «Белсат».

10 траўня рэдактар выдання «Витебский курьер news» даведаўся, што яго ўключылі ў «экстрэмісцкі спіс» на сайце МУС — як удзельніка перадвыбарчай ініцыятывы «Еўрапейскі выбар», абвешчанай уладамі «экстрэмісцкім фарміраваннем».