Рэдактарка “Витебского курьера“ дамаглася, каб мясцовы паблік перастаў перадрукоўваць артыкулы выдання без спасылак

Чытачы заўважылі, што на старонцы  “Типичного Витебска” з’яўляюцца  тэксты без спасылак на першакрыніцу, і Вольга Радзюк запатрабавала спынення гэткай практыкі. Паводле яе словаў, давялося шмат перапісвацца з мадэратарамі, атрымаць на свой адрас нямала негатыўных выразаў і нават абразаў, перш чым на старонцы  “ВКонтакте” з’явілася абвестка:  “Артыкулаў ад Курьера больш не будзе”.

Зрэшты, адміністратары суполкі “Типичный Витебск” паспрабавалі падаць сітуацыю такім чынам, нібыта “Витебский курьер“ патрабаваў, каб “давалі спасылку пад кожным радком, а лепш праз сказ, а яшчэ лепш паблік перайменавалі ў Курьер і аддалі адмінку”. У каментарах ад “Типичного Витебска” гучыць, што “артыкул ад ВК прапануе чытанне ўнутры пляцоўкі, што скрайне мэтазгодна з пункту гледжання карыстальніка”, і што чытачы не будуць пераходзіць па спасылцы на сайт  іншага выдання. Чым падмацаванае гэтае меркаванне – невядома. Рэдактарка “Витебского курьера“ лічыць, што гэта банальны крадзеж тэкстаў, над якімі працавалі аўтары.

Пасля “ультыматуму” суполкі перадрукі з “Витебского курьера“ насамрэч перасталі з’яўляцца на “Типичном Витебске”. Але практыка перацягвання чужога кантэнту працягваецца. Механізм “апрацоўкі” наступны: адміністратары бяруць тэкст , прыкладам, з tut.by, і перадрукоўваюць  яго ад імя “Типичного Витебска”, змясціўшы спасылку на першакрыніцу ў самым нізе. Адпаведна, са старонкі суполкі спасылка вядзе не на аўтарскі артыкул з tut.by, а на перадрук унутры пабліка. Такім чынам, ён набірае колькасць чытачоў, а выданне-першакрыніца іх губляе.

З каментароў да дэманстрацыйнай абвесткі пра тое, што артыкулаў  з “Витебского курьера” на “Типичном Витебске” больш не будзе, відаць неабыякавае стаўленне чытачоў да праблемы нелегальнага перадруку аўтарскага кантэнту. Наведнікі суполкі згадваюць, што бачылі перадрукоўкі без спасылак  і з tut.by, і з “Народных навінаў Віцебска”. Чытачы кажуць, што неабходнае прававое рэгуляванне такіх перапостаў – каб нелегальная падача аўтарскіх матэрыялаў без спасылак на арыгінал каралася паводле заканадаўства.