Рэдактара Ірыну Новік судзілі паўторна. Вынік — 725 рублёў штрафу

На паўторным разглядзе суддя Руслан Гурын вынес такі самы штраф, як раней прызначала суддзя Алена Пятрова — 25 базавых велічыняў (725 рублёў).

Новы працэс па гэтай справе прайшоў у адсутнасці журналісткі. Па стане здароўя Ірына Новік пакінула краіну, каб прайсці курс лячэння за мяжой. Яе просьбу адкласці разгляд справы да вяртання ў Беларусь суддзя Руслан Гурын адхіліў.

Журналістку асудзілі паводле артыкула 19.11 КаАП («Распаўсюд інфармацыйнай прадукцыі, якая змяшчае заклікі да экстрэмісцкай дзейнасці або якая прапагандуе такую дзейнасць»). За тое самае парушэнне пакаралі і рэдакцыю сайта — 18 чэрвеня суддзя Ганна Ляусік вынесла максімальны штраф у 500 базавых велічыняў (14 500 рублёў).

За што судзілі Ірыну Новік

Распаўсюдам экстрэмісцкіх матэрыялаў суд палічыў памылкова размешчанае на сайце Hrodna.life фота с лагатыпам Telegram-канала, прызнанага ў Беларусі экстрэмісцкім. Памылку заўважылі праз некалькі гадзін і выдалілі фота. За гэты час здымак з «экстрэмісцкім» лагатыпам паспеў заўважыць намеснік начальніка аддзелу аховы правапарадку і прафілактыкі Андрэй Пігульскі. Ён праходзіў сведкам па справе.

Першы суд над Ірынай Новік адбыўся 3 чэрвеня. Да суда яна знаходзілася ў ізалятары часовага ўтрымання на Кірава, 1. Суд прайшоў у актавай залі Ленінскага РАУС. Пра час пасяджэння папярэдняй інфармацыі не было. Адвакату таксама пра гэта не паведамілі, хаця яна накіравала ў суд хадайніцтва аб удзеле ў працэсе.

Журналістка напісала скаргу ў абласны суд. Там справу разглядаў суддзя Віктар Сянько. «Пастанову суддзі нельга прызнаць законнай, яна падлягае адмене, а справа — накіраванню на новы разгляд», — пастанавіў ён 20 ліпеня.

Прысуд ад 29 ліпеня Ірына Новік таксама мае намер абскарджваць. На яе думку, суддзя прызначыў строгае спагнанне, не прыняўшы пад увагу стан здароўя і час, праведзены ў ІЧУ да разгляду справы.

Пераслед Hrodna.life

Першы суд за распаўсюд экстрэмісцкіх матэрыялаў адбыўся 19 сакавіка. Тады суд Ленінскага раёна прысудзіў рэдактару Hrodna.life Аляксею Шоту штраф у 400 базавых велічынь (11 600 рублёў) — як прадстаўніку арганізацыі — і 25 базавых велічынь (725 рублёў) — як фізічнай асобе. Гродзенскі абласны суд 26 красавіка пакінуў у сіле рашэнне раённага. Выплаціць штраф у 11 600 рублёў у растэрміноўку на шэсць месяцаў рэдакцыі не дазволілі.

18 чэрвеня Hrodna.life прысудзілі другі штраф. Цяпер ён максімальна магчымы — 14 500 рублёў. У рэдакцыі ёсць яшчэ некалькі тыдняў, каб выплаціць яго. Таксама 20 чэрвеня рэдактар атрымаў папярэджанне ад пракурора Гродна Уладзіміра Клішына.

2 жніўня рэдакцыя атрымала ліст аб прымусовай ліквідацыі юрасобы ТАА «Гродна Лайф Медыя», якой належыць сайт Hrodna.life. Пазоў у эканамічны суд «у мэтах абароны дзяржаўных і грамадскіх інтарэсаў» скіравала Гродзенская пракуратура. Пракурор Уладзімір Клішын сцвярджае, што «Гродна Лайф Медыа» праводзіць дзейнасць, забароненую законам. Папярэдняе пасяджэнне суда прызначана на 11 жніўня.