«Радыё Свабода» выпускае падкаст-серыял пра «ўсе кругі пекла карнай сістэмы рэжыму Лукашэнкі»

«Радыё Свабода» выпускае падкаст-серыял «Архіпелаг БЕЛАГ», які «ў дэталях расказвае, як арганізаваная карная сістэма рэжыму Лукашэнкі», паведамляецца ў прэс-рэлізе.

Усяго ў серыяле будзе сем эпізодаў.

Ужо выйшаў першы, у якім паведамляецца пра “затрыманні, гвалт у кабінетах ГУБАЗіКа і КДБ, катаванні на Акрэсціна”.

“Мы правядзём вас праз усе кругі пекла карнай сістэмы рэжыму Лукашэнкі — затрыманне, “суткі”, следства, хатнія арышты, “хімію”, этапы, калоніі, турмы і жыццё пад наглядам па вызваленні. У гэтым нам дапамогуць былыя палітзняволеныя, былыя сілавікі, праваабаронцы, а таксама нобелеўская лаўрэатка Святлана Алексіевіч”, — гаворыцца ў рэлізе.

Журналісты анансуюць падрабязную інфармацыю пра тое, як пабудаваны “Архіпелаг БЕЛАГ” знутры, на чым ён трымаецца, якія людзі там працуюць, “на чый загад палітвязняў катуюць і даводзяць да смерці”.

Удзельнікамі падкастаў будуць былым палітвязні, экс-сілавікі, праваабаронцы.

Адзначаецца, что візуалізацыю праекта дапамагалі рабіць былыя палітзняволеныя Марыя Каленік, Лявон Халатран, Віктар Пархімчык, Анастасія Булыбенка, Наталля Карнеева і яшчэ некалькі чалавек, якія пажадалі захаваць ананімнасць.

“У свеце мала ведаюць пра гуманітарную катастрофу ў Беларусі, а ўлады імкнуцца зрабіць рэпрэсіі нябачнымі, салідарнасць немагчымай, злачынствы схаванымі, галасы палітвязняў фальшывымі ці нячутнымі, — адзначыла аўтар падкаст-серыялу журналістка Ганна Соўсь. — Тэма палітвязняў была прыярытэтнай для журналістаў “Радыё Свабода” ўсе гады кіравання Аляксандра Лукашэнкі. Рэжым не зможа нармалізаваць рэпрэсіі, бо расказанае, запісанае, візуалізаванае застанецца”.

Выданне цытуе Святлану Алексіевіч: “Канечне, “Архіпелаг БЕЛАГ”. Дакладную назву вы знайшлі. Так сёння і ёсць, але тут не такі размах, як у “Архіпелагу ГУЛАГу”. Мы ж маленькая краіна. Усе адзін аднаго ведаюць. Урэшце, у нас няма ані Магадана, ані Калымы, калі магчыма кудысьці далёка саслаць людзей і не бачыць іх. Тут яны ўсе будуць нібы на вачах. Але захаваўся дух, захаваліся спосабы катаў, захавалася іх псіхалогія, іх разуменне. І гэта ўсё Сталін, сталінскі час. Мы ніяк не можам выжыць з сябе Сталіна, і ўвогуле чалавечая прырода аказваецца нетрывалая”.

Новыя выпускі падкасту “Архіпелаг БЕЛАГ” будуць выходзіць па аўторках на ютуб-канале “Радыё Свабода” і на асноўных падкаст-платформах.