«Принципу правды» не вераць? У Віцебску ідэалагічны праект мясцовага тэлебачання амаль не збірае праглядаў у YouTube

Сёлета Віцебская ТРК заснавала ўласны «грамадска-палітычны праект пра галоўнае ў Беларусі» — праграму «Принцип правды». Першы выпуск выйшаў 6 верасня і уяўляў сабой мікс пра наступствы 2020 года, палітыку Байдэна, спонсарскую падтрымку Украіны і планы Захаду. У мясцовай прэсе разгарнулі рэкламную кампанію новага праекта. 

Прагляды першага выпуска ў YouTube дасягнулі лічбы 547, другога — 662. Прагляды трэцяга выпуска прадэманстравалі правал — рэзка ўпалі да 159. Праваабаронцы мяркуюць, што на гэта паўплывала спыненне рэкламы праекту.

«Антырэкорд» паказаў выпуск перадачы ад 6 снежня – 92 прагляды, на 6 праглядаў болей набраў выпуск ад 13 снежня. 
Нягледзячы на гэта, «Принцип правды» працягваюць выпускаць штотыдзень. Апошнія перадачы ператварыліся ў пераказ звестак пра паездкі Аляксандра Лукашэнкі, якія фактычна дублююць кантэнт дзяржаўных СМІ. 

Праект даручылі весці Сяргею Ісколу і Марыі Дэкан, якія да гэтага працавалі як рэпарцёры. Марыя Дэкан была ўдзельніцай журналісцкага конкурсу «Хвала рукам, что пахнут хлебом», прымеркаванага асвятленню ўборкі ўраджаю ўвосень мінулага года. Яе аповед пра жанчыну-камбанёрку з Дубровенскага раёна быў прызнаны адной з найлепшых прац. Сяргей Іскол, выпускнік журфака БДУ 2019 года, спрабуе весці перадачу ў манеры Грыгорыя Азаронка —  са звыклымі штампамі пра «кучку радыкалаў і праплачаных апазцыянераў», што «спрабавалі дэстабілізаваць абстаноўку ў 2020 годзе», пра «забароненыя рэсурсы, якія працягваюць беспаспяхова ўкідваць фэйкі» і «зладжаныя дзеянні вайскоўцаў і міліцыянтаў» у падаўленні народных пратэстаў. У якасці эксперта у праграму найчасцей запрашаюць дырэктара Нацыянальнай бібліятэкі Вадзіма Гігіна.

У выніку сумарная колькасць праглядаў 16-ці выпускаў «Принципа правды» не дасягнула 3,5 тысячы. Асобныя выпускі найчасцей праглядаюць не больш як 200 чалавек.

Чытайце яшчэ:

У Брэсце распавялі пра наклады дзяржаўных раёнак і агучылі задачы для прапагандыстаў

Прапагандыстка Худалей, якая працавала на жаночых маршах, звольнілася з СТБ і шукае працу ў IT

У Баранавічах старшыня гарвыканкама зладзіў прэс-канферэнцыю для мясцовых блогераў