Пракуратура Брэсцкай вобласці распавяла, колькі «экстрэмісцкай» інфармацыйнай прадукцыі знайшлі ад пачатку 2024 года

Пракуратура Брэсцкай вобласці падрыхтавала новую справаздачу аб сваёй барацьбе з распаўсюдам на інтэрнэт-рэсурсах інфармацыі, «накіраванай на павышэнне сацыяльнай напружанасці ў грамадстве і стварэнне недаверу да прадстаўнікоў органаў дзяржаўнай улады».

Пракуратура Брэсцкай вобласці. Фота: Валерый Кароль

Паводле службы інфармацыі надзорнага ведамства, за студзень-верасень 2024 года ў суды было накіравана 266 заяў аб прызнанні інфармацыйнай прадукцыі «экстрэмісцкімі матэрыяламі».

У прыватнасці, такое рашэнне прынялі ў дачыненні да 99 Telegram-чатаў і каналаў, 33 старонак у Insta­gram, 13 інтэрнэт-сайтаў, 21 акаўнта ў Tik­Tok, 15 акаўнтаў у сацыяльнай сетцы «Одноклассники», 14 акаўнтаў у «ВКонтакте», 38 акаўнтаў у Face­book, шасці друкаваных выданняў (гаворка вядзецца пра кнігі), двух акаўнтаў у сацыяльнай сетцы X (Twit­ter), трох груп у Viber, а таксама 8 каналаў на відэахостынгу YouTube.

У якасці прыкладу ў абласной пракуратуры адмыслова згадалі працу пракуратуры Лунінецкага раёна. На падставе яе зваротаў у суд былі прызнаныя экстрэмісцкай інфармацыйнай прадукцыяй кантэнт старонак «Старый Лунин» у сацыяльнай сетцы «Одноклассники» і «Беседы беларуской революции» ў месенджары Telegram.

Спыняцца пракуроры не збіраюцца. Паведамляецца, што ў Брэсцкую абласную экспертную камісію накіраваныя хадайніцтвы для ацэнкі інфармацыйнай прадукцыі яшчэ пяці інфармацыйных крыніц «на наяўнасць у іх прыкмет экстрэмізму». У надзорным ведамстве абяцаюць, што пасля атрымання экспертных высноў будзе вырашанае пытанне пра накіраванне ў суд адпаведных заяў.