Памёр вядомы расійскі тэлежурналіст Мікалай Сванідзэ

Вядомы журналіст Мікалай Сванідзэ памёр у сераду ўвечары ў Маскве. Пра гэта паведамляюць расійскія СМІ.

Фота: Радио Свобода

Сванідзэ было 69 гадоў. Прычынай смерці называюць ускладненні ад пнеўманіі.

Як стала вядома «МК», Сванідзэ памёр у сераду ўвечары ў сваёй маскоўскай кватэры на вуліцы Маршала Васілеўскага.

«Апошнія гады Мікалай Сванідзэ цяжка хварэў, яму дыягнаставалі ішэмію галаўнога мозгу», — піша выданне.

Па дадзеных «112», у журналіста дыягнаставалі пнеўманію. «Урачы прыехалі да яго дадому, але выратаваць яго не ўдалося. Ён памёр ад ускладненняў», — адзначае тэлеграм-канал.

Да гэтага ён таксама звяртаўся па дапамогу да дактароў, але адмаўляўся ад шпіталізацыі. Скардзіўся на праблемы з дыханнем і тэмпературу, удакладняе Mash.

SHOT піша, што апошні год журналіст праходзіў рэабілітацыю пасля хваробы. «У лютым 2023 года Сванідзэ патрапіў у лякарню ў цяжкім стане з ацёкам лёгкіх <…> У яго таксама назіраліся вострая сардэчная, дыхальная і нырачная недастатковасць, сэптычны шок і сэпсіс».

Мікалай Сванідзэ працаваў на расійскім тэлебачанні з 1991 года, стаяў ля вытокаў яго стварэння. Быў вядучым папулярных грамадска-палітычных праграм, такіх як «Подробности», «Контрасты», «Зеркало», «Исторические хроники» ды іншыя. У 1997–1998 гадах займаў пасаду старшыні ВДТРК. З 2013 па 2022 год працаваў на радыёстанцыі «Серебряный дождь», дзе таксама вёў навінавыя і гістарычныя эфіры.

У дзень пачатку поўнамаштабнага ўварвання Расіі ва Украіну, 24 лютага 2022 года, у прамым эфіры назваў яго «нематываваным і несправакаваным нападам». У далейшым неаднаразова казаў аб наступствах «крывавай вайны» для Расіі.

У лістападзе 2022 года Уладзімір Пуцін выключыў Сванідзэ з Савета па правах чалавека — разам з іншымі праваабаронцамі і журналістамі.

У снежні 2022 года Сванідзэ звольнілі з пасады дырэктара Інстытута масмедыя і рэкламы РДГУ, якую ён займаў дванаццаць гадоў.