«Не магу паверыць». Дырэктарка «Белсату» расказала, што бюджэт тэлеканала скарачаюць амаль удвая

Дырэктарка «Белсату» Агнешка Рамашэўска-Гузы паведаміла, што бюджэт тэлеканала урэзалі амаль на 50%. Яна адзначыла, што такога скарачэння не вытрымае ніводная ўстанова.

 Агнешка Рамашэўска-Гузы. Фота: БелаПАН

«У якасці падарунка да жаночага дня — ліквідацыя — не дэ-юрэ, але дэ-факта. Не магу паверыць», — напісала Агнешка Рамашэўска-Гузы на сваёй старонцы ў Face­book.

Яна патлумачыла, што фінансаванне «Белсату» вядзеца ў асноўным праз польскае Міністэрства замежных спраў. У мінулым годзе бюджэт складаў 74 мільёны злотых (63 мільёны ад МЗС і 11 мільёнаў ад TVP). У гэтым годзе тэлеканал атрымае 40 мільёнаў ад МЗС, а TVP «нічога не дасць, бо не мае».

Дырэктарка «Белсату» мяркуе, што «ніводная ўстанова, і тым больш тая, якая вельмі эфектыўна распараджаецца грашыма, не вытрымае амаль 50-працэнтнага скарачэння бюджэту».

Агнешка Рамашэўска-Гузы пералічыла напрамкі працы «Белсату»:

• рэдакцыя тэленавін (беларуская мова);
• рэдакцыя тэленавін (руская мова);
• праграмная рэдакцыя (фільмы, рэпартажы, публіцыстычныя і адукацыйныя праграмы і г.д.);
• інтэрнэт-партал навін на беларускай мове;
• інтэрнэт-партал навін «ВотТак» на рускай мове;
• інтэрнэт-партал навін на польскай мове;
• інтэрнэт-партал навін на англійскай мове;
• падрыхтоўка праграм і кантралёры праграм;
• аддзел сацыяльных сетак;
• аддзел падтрымкі YouTube;
• аддзел тэлетэхнікі і інфарматыкі;
• эканамічны аддзел;
• аддзел аналізу аўдыторыі.