На журналістку склалі адміністрацыйны пратакол за фота сваіх рэчаў у пункце пропуску праз мяжу

А здарылася наступнае: 17 лістапада Ларыса Шчыракова з сынам вярталася ў Беларусь з адпачынку праз памежны пункт пропуску «Новая Гута», тады ў яе адной з групы правялі паглыблены дагляд асабісты рэчаў і забралі на праверку ноўтбук.

Шчыракова ў зале мытнага кантролю сфатаграфавала свае рэчы і акт мытнага дагляду і змясціла два здымкі на сваёй старонцы ў Face­book. Гэта і стала сведчаннем парушэння рэжыму ў пункце пропуску, паколькі заканадаўства аб дзяржаўнай мяжы забараняе фізічным асобам весці фота- і відэаздымкі.

«Я патлумачыла інспектарцы мытных расследаванняў, што зрабіла здымкі, каб засведчыць, што мяне ўнеслі ў нейкі «чорны спіс» як незалежную журналістку і адмыслова правяраюць на мяжы па вяртанні на радзіму. Так было і да выпадку ў “Новай Гуце” — на пачатку лістапада, калі я прыляцела ў аэрапорт з Сербіі. Я не тэрарыстка і не кантрабандыстка якая, што мяне абавязкова “трасуць” на мяжы», — распавяла карэспандэнту службы маніторынгу ГА «БАЖ» Ларыса Шчыракова.

Яна дадала, што ў яе ноўтбуку захоўваюцца прыватныя здымкі, перапіска. Раней у журналісткі забіралі на праверку асабісты камп’ютар супрацоўнікі УКДБ. Пасля гэтага нават інтымныя фотаздымкі з гэтага камп’ютара нейкім чынам апынуліся  ў свабодным доступе ў інтэрнэце. Шчыракова асцерагаецца паўтарэння падобнага сцэнару, таму і сфатаграфавала менавіта свае рэчы і акт, не пасягаючы на нейкія памежныя ці мытныя сакрэты.

Паводле пункта 1, артыкула 23.32 КаАП, парушэнне рэжыму ў пунктах пропуску караецца штрафам да 50 базавых велічын, а для замежнікаў — яшчэ і мажлівай дэпартацыяй.