Міжнародная федэрацыя журналістаў заклікае СМІ адказна паведамляць пра каранавірус

IFJ мяркуе, што роля СМІ заключаецца ў прадастаўленні грамадзянам праверанай, дакладнай і фактычнай інфармацыі і пазбяганні сенсацый, якія  могуць прывесці да панікі і страху.

«Ва ўмовах катастроф і эпідэмій Міжнародная Хартыя этычнай журналістыкі IFJ набывала вялікае значэнне. Прынцыпы, сабраныя ў гэтай Хартыі, з’яўляюцца найлепшым антыдотам супраць дэзінфармацыі, фальшывых навін і тэорый змовы, якія распаўсюджваюцца ў сацыяльных медыя. Як адзначаецца ў першым артыкуле Хартыі, «павага да фактаў і права грамадства на ісціну — гэта першы абавязак журналіста».

Журналісты і СМІ павінны паведамляць пра факты, выкарыстоўваючы надзейныя навуковыя крыніцы, пазбягаючы здагадак. Варта пазбягаць слоў, якія могуць стварыць стан трывогі, што не адпавядае рэчаіснасці. Журналісты таксама павінны быць асабліва адчувальнымі да асабістай інфармацыі пацярпелых людзей», — гаворыцца ў адмысловым звароце Міжнароднай федэрацыі журналістаў.

IFJ таксама заклікае дзяржаўныя органы і медустановы прадастаўляць своечасовую і празрыстую інфармацыю, каб журналісты мелі доступ да ўсіх дадзеных.

IFJ аб’ядноўвае больш за 600 000 журналістаў з 146 краінаў. З 1997 года Беларуская асацыяцыя журналістаў — асацыяваны сябра Міжнароднай федэрацыі журналістаў.