Мінінфармацыі знайшло «прыкметы праяваў экстрэмізму» на двух сайтах

“На падставе рашэння суда Цэнтральнага раёна г. Мінска, якое ўступіла ў законную сілу 18 жніўня 2015 года, аб прызнанні інфармацыйнай прадукцыі экстрэмісцкімі матэрыяламі і, кіруючыся Законам Рэспублікі Беларусь «Аб сродках масавай інфармацыі», Міністэрствам інфармацыі 19 жніўня 2015 года, прынята рашэнне аб абмежаванні доступу да двух інфармацыйных рэсурсаў у сетцы Інтэрнэт, з дапамогай якіх распаўсюджвалася інфармацыйная прадукцыя, якая змяшчае прыкметы праявы экстрэмізму ў частцы распальвання расавай, сацыяльнай і рэлігійнай варожасці”.

Такое паведамленне з’явілася 21 жніўня на сайце Міністэрства інфармацыі.   

30 чэрвеня міністр Лілія Ананіч паведаміла, што ў 2015 годзе яе ведамства блакавала 26 рэсурсаў. Да двух з іх – hata.by і kyky.org – доступ быў адноўлены.

А ў лютым г.г.  БелТА са спасылкай на міністра паведаміла, што больш за 100 матэрыялаў разгледжаныя рэспубліканскай экспертнай камісіяй па ацэнцы інфармпрадукцыі на экстрэмізм. А ў 25‑і з іх “былі прыкметы, якія падпадаюць пад пазіцыі “экстрэмізм, прапаганда ідэй нацызму, расавай, рэлігійнай нецярпімасці” ці “літаратура, якая магла б выкарыстоўвацца ў тэрарыстычных мэтах”.  

У снежні 2014 г. улады ў тэрміновым парадку ўнеслі змены ў закон “Аб сродках масавай інфармацыі”, датычныя, у першую чаргу, анлайн-рэсурсаў. Ніжняя палата Нацыянальнага сходу ўхваліла іх адразу ў двух чытаннях 17 снежня, верхняя зацвердзіла 18 снежня, а прэзідэнт падпісаў абноўлены закон 20 снежня. У сілу ён уступіў з 1 студзеня 2015 г. Згодна з гэтым дакументам Міністэрства інфармацыі атрымала права блакаваць доступ да анлайн-рэсурсаў нават без рашэння суда.