Медыяпраект «Настоящее время» ў Беларусі абвясцілі экстрэмісцкім

Паводле інфармацыі на сайце Мінінфарма, адпаведнае рашэнне 5 студзеня прыняў суд Чыгуначнага раёна Віцебска.

Забароненымі для распаўсюду на тэрыторыі Беларусі суд прызнаў сайт медыя з даменным імем currenttime.tv, а таксама яго шматлікія YouTube- і Telegram-каналы, акаўнты і суполкі ў сацыяльных сетках і лагатып.

У прыватнасці, экстрэмісцкімі цяпер лічацца:

• Telegram-канал «Настоящее Время. Беларусь» (t.me/currenttimebelarus),

• YouTube-канал «Настоящее Время. Беларусь»,

• Акаўнт у Insta­gram «Настоящее Время. Беларусь»,

•  Акаўнт у «Tik­Tok» «Настоящее время. Беларусь».

«Настоящее время» рэгулярна асвятляе палітычныя падзеі ў сучаснай Беларусі. Відэаматэрыялы на беларускую тэматыку акамулююцца на гэтых інтэрнэт-рэсурсах.

Тэлеканал, створаны карпарацыяй Радыё Свабодная Еўропа/Радыё Свабода (RFE/RL) пры ўдзеле «Голасу Амерыкі» і фундаваны з дапамогай грантаў Кангрэса ЗША праз Агенцтва па глабальных медыя (USAGM). Тэлеканал працуе на рускай мове 24 гадзіны ў суткі, яго перадачы можна глядзець у Расіі, Украіне, краінах Цэнтральнай Азіі і Усходняй Еўропы, а таксама ў іншых рэгіёнах.

Паводле афіцыйнага сайта медыяпраекта, місіяй «Настоящего  времени» з’яўляецца «прасоўванне дэмакратычных каштоўнасцяў і інстытутаў, а таксама правоў чалавека». Рэдакцыя тэлеканала знаходзіцца ў Празе (Чэхія), а журналісты працуюць у Расіі, Украіне, Казахстане, Азербайджане, Беларусі, Грузіі, Кыргызстане і іншых постсавецкіх краінах.