Макрон абвясьціў вайну «фэйкавым навінам»

RT тым ня менш атрымаў ад францускіх уладаў ліцэнзію на трансьляцыю і запусьціў францускую вэрсію каналу ў сьнежні летась. Але Макрон сваіх слоў не забыўся і анансаваў закон супраць fake news і замежнай прапаганды.

«Навагодні падарунак» журналістам ад францускага прэзыдэнта

На традыцыйнай сьвяточнай сустрэчы Эмануэль Макрон паабяцаў: ён паспрабуе, каб fake news больш не азмрочвалі мэдыя-прастору краіны.

«Мы занясем у заканадаўства зьмены, якія дапамогуць абараніць дэмакратыю ад фэйкавых навінаў», — сказаў ён.

Згодна з законам, прапанаваным прэзыдэнтам:

• сайты навінаў раскрыюць сваіх спонсараў;

• карыстальнікі змогуць скардзіцца на фэйкі ў суд, які атрымае права блякаваць альбо фальшыўку, або ўвесь партал;

• мэдыя-рэгулятар зможа спыняць працу замежных СМІ, абвінавачаных у прапагандзе;

• дзейнічаць гэтыя правілы будуць у пэрыяд перадвыбарных кампаній.

Макрон vs фэйкі

Стаўленьне да фэйкаў у Эмануэля Макрона асаблівае. Год таму, балятуючыся ў прэзыдэнты Францыі, ён быў мішэньню мноства фальшывак. Пляткарылі аб яго асабістым жыцьці, казалі пра афшорныя рахункі на Багамах.

Пры чым тут RT

Крыніцай і плятформай для многіх фэйкаў, лічыць Макрон, былі расейскія вэб-парталы Sput­nik і RT. «Гэта не сапраўдныя СМІ», — заявіў ён на сустрэчы з Уладзімірам Пуціным у траўні летась.

Прайшло паўгода, і, нягледзячы на пазыцыю прэзыдэнта, у Францыі запрацаваў тэлеканал RT.

Неўзабаве пасьля гэтага Эмануэль Макрон прапанаваў новы закон для барацьбы з фэйкавымі навінамі.

Ідэя не бездакорная

У добрага пачынаньня нямала крытыкаў. І гэта ня толькі тыя, хто баіцца дзяржаўнай цэнзуры. Па-першае, незразумела, чым новы закон лепшы існуючых:

• У Францыі з 1880‑х існуе закон, які забараняе публікацыю і распаўсюд паклёпу.

• Што такое fake news? Як вызначыць, што зьяўляецца фэйкам? Калі інфармацыя апублікаваная зь найлепшых памкненьняў, але аказваецца памылковай, ці трапляе яна пад вызначэньне fake news?