Магілёўскі абласны суд адхіліў скаргу журналістаў Аліны Скрабуновай і Яўгена Глушкова

Журналістам быў пастаўлены ў віну выраб двух відэасюжэтаў для тэлеканала “Белсат” — пра высяленне жыхароў дамоў у Магілёве з‑за памылкі ўладаў, і пра самагубства кіраўніка аграхолдынга “Купалаўскае” ў Шклоўскім раёне.

Суддзя Міхаіл Мельнікаў не прыняў да ўвагі довады журналістаў аб шматлікіх парушэннях, дапушчаных супрацоўнікамі праваахоўных органаў пры складанні пратаколаў аб адміністрацыйных правапарушэннях у адносінах да іх. Таксама Міхаіл Мельнікаў не звярнуў ніякай увагі на абгрунтаваны выступ Аліны Скрабуновай, у якім журналістка распавяла пра перадузятае стаўленне з боку суддзі суда Ленінскага раёна Таццяны Касцюк, і яе сведчанні аб тым, што аўтарамі відэасюжэта на тэлеканале “Белсат” як “прадукцыі СМІ” з’яўляюцца іншыя журналісты.

“Суддзя Касцюк у матывіровачнай часцы пастановы спасылаецца на мае сведчанні і сведчанні сведак, якіх наогул не было, — адзначыла Аліна Скрабунова. — Яна з’яўляляецца зацікаўленай асобай, бо раней ужо выносіла аналагічны прысуд у адносінах да мяне”.

Нагадаем, у лістападзе 2017 года суддзя Таццяна Касцюк ужо карала Аліну Скрабунову штрафам у памеры 30 базавых велічынь паводле ч. 2 арт. 22.9 КаАП.

Міхаіл Мельнікаў адхіліў хадайніцтвы Скрабуновай аб прыцягненні ў якасці экспертаў для вызначэння, што з’яўляецца вырабам прадукцыі СМІ, дэкана журфака БДУ і кіраўніка аддзялення журналістыкі Магілёўскага дзяржаўнага унівірсітэта імя Аркадзя Куляшова. Разам з тым упершыню за апошнія гады ў самым пачатку судовага пасяджэння суддзя Мельнікаў дазволіў журналістам весці фота- і відэаздымкі падчас судовага працэса.

Пасля невялікага перапынку суддзя Міхаіл Мельнікаў прыняў рашэнне пакінуць без зменаў рашэнне суда Ленінскага раёна Магілёва і сумесную скаргу Скрабуновай і  Глушкова без задавальнення. Рашэнне суда Ленінскага раёна ўступіла ў законную сілу і ўжо бліжэйшым часам журналісты Аліны Скрабунова і Яўген Глушкоў павінны выплаціць штрафы ў памеры 50 і 30 базавых велічынь адпаведна.

Праваабаронца Барыс Бухель лічыць, што журналістам няма ніякага сэнсу далей падаваць наглядны скаргі ў вышэйстаячыя судовыя інстанцыі, бо папярэдняя практыка паказала тое, што  па палітычна матываваных справах ніякія абгрунтаваныя довады і аргументы не прымаюцца імі да ўвагі.

Скрабунова і Глушкоў таксама лічаць,адміністрацыйную справу ў адносінах да сябе палітычна матываванай, бо парушаецца гарантаванае Канстытуцыяй права на атрыманне і распаўсюд дакладнай інфармацыі. Ужо ў бліжэйшы час журналісты будуць рыхтаваць скаргі для далейшай падачы ў Камітэт па правах чалавека ААН.