Каталіцкае радыё ў Беларусі можа страціць дом, у якім зараз працуе

Каталіцкае «Радыё Марыя» павінна цягам трох месяцаў пакінуць будынак, у якім працавала 8 гадоў.

Пра выселенне са «свайго» дому «Радыё Марыя» паведаміла на старонцы Face­book. Прычына ў тым, што будынак прадаюць новаму ўласніку. 

«Выезд для нас — гэта не проста «задача», гэта як раз «праблема». Бо нашы патрабаванні да памяшкання надта высокія, а нашыя магчымасці надта малыя», — гаворыцца у посце.

Зараз рэдакцыя шукае спосабы, як вырашыць гэтую праблему. Супрацоўнікі адкрылі збор грошай, каб самім выкупіць памяшканне. Трэба сабраць 140 тысяч долараў да 12 сакавіка. Гэта план «на ўзроўні цуда», адзначаюць у рэдакцыі, але, як вернікі, спадзяюцца на поспех.

Калі выкупіць дом не атрымаецца, грошы пойдуць на арэнду новага памяшкання. Ахвяраванні прымаюць толькі з Беларусі.

«Радыё Марыя» дзейнічае ў Беларусі з 2016 года. Гэта міжнароднае хрысціянскае радыё, заснаванае ў 1963 годзе ў Італіі. Сёння яно працуе больш чым у 70 краінах свету. Эфір вядзецца на роднай мове кожнага народа. Гэта  некамерцыйны праект: на хвалях «Радыё Марыя» няма рэкламы, яно не фінансуецца касцёлам. Асноўная мэта — інфармаванне вернікаў аб каталіцкім  жыцці і дапамога ў штодзённай малітве.