Творчы конкурс-фэст для сябраў ГА «БАЖ» (да 13 траўня)

Мы шмат чулі, і чутка гэтая намі правераная, што сярод журналістаў шмат творчых людзей… Мы вырашылі: хопіць андэграўнду, час выходзіць з падполля!.. І вось, упершыню ГА «Беларуская асацыяцыя журналістаў» ладзіць творчы конкурс-фэст!

Віды заўважанай намі творчасці разнастайныя, але для пачатку мы б хацелі даведацца пра стан спраў у найбольш распаўсюджаных накірунках.

Таму творчы конкурс праводзіцца ў трох намінацыях: паэзія, аўтарская песня і мастацкае фота.

Конкурс-фэст ладзіцца з мэтай стварыць умовы для рэалізацыі творчага патэнцыялу і для інтэграванасці паміж сабой журналістаў з розных рэгіёнаў краіны.

Агульныя патрабаванні для ўдзельнікаў конкурсу:

1. Удзельнічаць у конкурсе маюць права сябры ГА «БАЖ».

2. Удзельнік, які адправіў творы на конкурс, пацвярджае тым самым сваё аўтарства і пагаджаецца з умовамі дадзенага конкурсу.

3. Мусяць быць указаныя назвы дасланых твораў, імя і прозвішча ўдзельніка, кантактны тэлефон і адрас электроннай пошты.

4. Творы неабходна даслаць да 13 траўня 2018 года на адрас аргкамітэта конкурса: tkfbaj2018@gmail.com.

Паэтычны конкурс

1. Удзельнічаць у конкурсе можа любы творца, які піша вершы на рускай або беларускай мовах.

2. Неабходна далучыць да ліста файл з трыма вершамі ўласнага сачынення або ўключыць іх у сам ліст.

Для ўдзелу ў конкурсе прымаюцца вершы любой тэматыкі і жанру — у памеры да 32 радкоў, для вершаў у прозе — да 2 500 знакаў.

Конкурс аўтарскай песні

1. Удзельнічаць у конкурсе можа любы творца, які піша і выконвае песні на беларускай або рускай мовах у суправаджэнні любых музычных інструментаў ці ансамбля (аркестра). Вы можаце не быць аўтарам тэксту, але аўтарства музыкі — абавязкова. У гэтым выпадку вы падаяце таксама імя і прозвішча аўтара тэксту…

Гэта — конкурс для аўтараў-выканаўцаў, таму, калі ў вас дуэт або трыо, таксама пакажыце імя і прозвішча выканаўцаў (яны таксама павінны быць сябрамі БАЖ).

2. Неабходна даслаць аўдыёзапісы трох твораў у фармаце mp3 або спасылку ў інтэрнэце, па якой можна было б азнаёміцца ​​з выступам канкурсанта.

Конкурс мастацкага фота

1. Удзельнік павінен быць аўтарам фотаматэрыяла, пададзенага на конкурс.

2. Прымаюцца здымкі добрай якасці ў жанрах: пейзаж, партрэт, нацюрморт, а таксама жанравае фота.

3. Удзельнік конкурсу пагаджаецца на безтэрміновую перадачу невыключных аўтарскіх правоў арганізатарам конкурсу і  размяшчэнне твораў з пазначэннем аўтарства на сайце ГА «БАЖ», у часопісе “Абажур”, у выдадзенай брашуры.

4. Тэхнічныя параметры. Колькасць работ ад аднаго аўтара: 3 паасобных здымка або адна серыя (колькасць фотаздымкаў у серыі — не больш за 4).

Фармат файла: jpeg

Імя файла: на лацініцы прозвішча-імя-нумар.jpeg.

Для ўдзелу ў конкурсе не дапушчаюцца работы з надпісамі, вадзянымі знакамі, любымі рамкамі. Фотамантаж забаронены.

Памер фота: 1 400 пікселяў па доўгім боку, аб’ём файла — не больш за 1 Мб.

У выпадку, калі вы патрапіце ў лік лаўрэатаў, будзе неабходна даслаць файл для друку фотаздымкаў 30x45 см.

Парадак правядзення конкурсу

Усе творы, якія ўдзельнічаюць у конкурсе, будуць закадаваныя і разглядацца журы ананімна. Кожны сябра ГА «БАЖ» можа браць удзел адразу ва ўсіх трох конкурсах. Удзельнікі конкурсу маюць права на поўную і дакладную інфармацыю аб правядзенні конкурсу.

Персанальныя дадзеныя ўдзельнікаў, прадастаўленыя арганізатарам конкурсу, з’яўляюцца канфідэнцыйнай інфармацыяй і не падлягаюць разгалашэнню.

Кампетэнтнае журы (склад будзе агучаны пазней) ацэньвае конкурсныя творы і вызначае лаўрэатаў. Асноўныя крытэрыі аценкі:

• мастацкія вартасці і арыгінальнасць твораў;
• выразнасць, вобразнасць, эмацыйнасць, актуальнасць;
• агульнае ўражанне ад твора.

У кожным з трох конкурсаў будуць разыграна першае, другое і трэцяе месцы. 15–16 траўня 2018 года вызначаным лаўрэатам конкурсу дасылаюцца лісты з запрашэннямі ў Бабруйск, дзе 27 траўня адбудуцца фінал творчага конкурса-фэста, выстава, канцэрт і ўзнагароджанне пераможцаў.

Інфармацыя аб правядзенні і выніках конкурсу будзе размешчана на сайце ГА «БАЖ».

Жадаем натхнення, творчых поспехаў і чакаем вашай актыўнасці!

Калі ўзніклі дадатковыя пытанні, пішыце на адрас аргкамітэта конкурсу: tkfbaj2018@gmail.com.