Школа журналістыкі рашэнняў (заяўкі да 25 мая)

Журналістыка рашэнняў — гэта пайсці на некалькі крокаў далей і занурыцца на некалькі ўзроўняў глыбей у асвятленне праблем грамадства. Адрозніваецца ад класічнай тым, што не толькі расказвае пра існаванне праблемы.

Журналістыка рашэнняў спалучае дэталёвы і комплексны аналіз праблемы, элементы следчай журналістыкі і паказвае на гісторыях канкрэтных людзей працэс вырашэння сістэмных праблем грамадства. Матэрыялы гэтага жанру — не толькі пра тое, што праблема вырашаецца, але і пра тое, як яна вырашаецца, чаму гэтае вырашэнне працуе, ці наадварот: чаму нешта не спрацоўвае.

Такім чынам чытач атрымлівае комплекснае разуменне сітуацыі і можа не толькі ставіцца да праблем, што асвятляюцца, больш крытычна, але і разумець сваю ролю ў іх вырашэнні.

Адметныя рысы гэтага падыходу — пошук доказаў эфектыўнасці / неэфектыўнасці рашэнняў і іх глыбокі сістэмны разбор, якія падаюцца ў форме зразумелых чытачу жыццёвых гісторый. Але адначасова жанр шукае адказы на наступныя складаныя пытанні:
 

• Якія мадэлі вырашэння праблемы спрацавалі?

• Як гэтыя мадэлі працуюць і чаму яны мелі поспех?

• «Што гэтыя людзі робяць па-іншаму, і ці могуць яны быць прыкладам для вырашэння падобных праблем у іншых месцах / акалічнасцях?»

Поруч з інфармацыйным кампанентам, важная і сацыяльна значная рыса журналістыкі рашэнняў — тое, што яна дапамагае грамадству вучыцца на пазітыўным ці негатыўным досведзе і робіць унёсак у вырашэнне праблем. Добрыя прыклады журналістыкі рашэнняў змяняюць тон і характар грамадскай дыскусіі, пераводзяць яе з канфрантацыйнага ці пасіўна-негатыўнага рэчышча ў дзейнасць, скіраваную на паляпшэнне сітуацыі.

Гэта не пра тое, каб напісаць чарговы артыкул, маўляў, усё дрэнна, ці прасунуць пэўную сацыяльна-палітычную павестку. Гэта пра тое, каб зрабіць людзей мацнейшымі, больш інфармаванымі і здольнымі на пазітыўныя змены.

Што такое журналістыка рашэнняў на прыкладзе New York Times, як ствараюцца праекты, чаму гэты жанр падвышае папулярнасць медыя і пашырае аўдыторыю і як журналістыка можа паляпшаць грамадства — пра ўсё гэта мы пагаворым на трэнінгах па журналістыцы рашэнняў ад TOL. Праграма прадугледжвае магчымасць прайсці стажыроўку ў замежных медыя ў Еўразвязе і ЗША, а таксама атрымаць мікрагрант на праекты ў гэтым жанры пры падтрыманні экспертаў з Solu­tions Jour­nal­ism Net­work.

Каб пакінуць заяўку на ўдзел, калі ласка, запоўніце форму да 25 мая. Падрабязнасці пра час і акалічнасці праведзення трэнінга, а таксама яго праграму адабраныя удзельнікі атрымаюць асобным лістом. Увага: колькасць месцаў абмежаваная!