Сучасныя тэндэнцыі ў прасоўванні журналістыкі ў сацыяльных сетках: досвед BBC і Deutsche Welle

Як эфектыўна выкарыстоўваць сацыяльныя сеткі для прасоўвання свайго кантэнту? Ці варта пераходзіць на кароткія фарматы і як працаваць з аўдыторыяй, калі працуеш у эміграцыі? Ці магчыма пабудаваць давер у сацыяльных сетках і заваяваць увагу маладой аўдыторыі? Адказы на гэтыя пытанні БАЖ спрабаваў знайсці на Wis­la Video Forum.

Wis­la Video Forum. Верасень 2024 года. Фота: аўтара БАЖ

Пытанні, пералічаныя вышэй, сёння вельмі актуальныя для беларускай медыясупольнасці. На іх паспрабавалі адказаць Джэрэмі Скiт і Эрыка Марзана, эксперты ў галіне сацыяльных медыя з Вялікабрытаніі і Германіі, якія падзяліліся сваім досведам падчас Wis­la Video Forum, які Press Club Belarus ладзіў у Варшаве.

• Джэрэмі Скiт — стратэг сацыяльных сетак і былы кіраўнік BBC News у Tik­Tok, адзін з ключавых спецыялістаў, якія развівалі медыястратэгію BBC на сацыяльных платформах.
• Эрыка Марзана кіруе развіццём аўдыторыі ў Deutsche Welle і спецыялізуецца на прасоўванні нямецкіх медыяў на Tik­Tok і Insta­gram.

Абодва эксперты падкрэслілі, што сацыяльныя сеткі сёння — не проста дадатковы інструмент для распаўсюджвання кантэнту, але адна з асноўных пляцовак для прыцягнення аўдыторыі.

 Як беларускім СМІ лепш зразумець сваю аўдыторыю?

Першае і галоўнае пытанне, якое стаіць перад любым медыя, — як дакладна вызначыць сваю аўдыторыю? У свеце, дзе ўсё больш увагі спажываецца праз сацыяльныя сеткі, веданне сваёй аўдыторыі становіцца ключом да поспеху. Сацыяльныя платформы, такія як Tik­Tok і YouTube, прапануюць выдатныя магчымасці для аналітыкі, але для малых і сярэдніх СМІ з абмежаванымі рэсурсамі гэта можа стаць сапраўдным выклікам.

Джэрэмі Скiт падкрэсліў, што ў любой стратэгіі сацыяльных сетак неабходна мець дакладнае разуменне сваёй аўдыторыі. «Не ведаючы сваю аўдыторыю, вы можаце забыцца пра паспяховае прасоўванне», — зазначыў ён. Важна вызначыць, што цікавіць чытачоў і дзе яны знаходзяцца: на якой платформе, у якім узросце і з якімі інтарэсамі. Для беларускіх медыяў гэта асабліва актуальна ў кантэксце работы ў эміграцыі, калі сувязь з аўдыторыяй унутры краіны можа быць абмежаваная.

Сацыяльныя сеткі дазваляюць назіраць за паводзінамі аўдыторыі праз лайкі, каментары і перапосты. Але не менш важным з’яўляецца прамы кантакт з чытачамі — праца з каментарыямі, пытанні і апытанні. Менавіта праз інтэрактыўнасць можна атрымаць больш дакладнае ўяўленне пра інтарэсы аўдыторыі і наладзіць з ёй давер.

Ці варта пераходзіць на кароткія і хуткія фарматы кантэнту?

Сёння ўсё больш і больш папулярнасці набіраюць кароткія фарматы кантэнту. Tik­Tok і Insta­gram Reels сталі сапраўднымі гігантамі ў прасоўванні кароткіх відэа. Але ці варта беларускім медыям зарыентавацца толькі на кароткія фарматы?

Джэрэмі Скiт і Эрыка Марзана на Wis­la Video Forum. Верасень 2024 года. Фота: аўтара БАЖ

Скiт адказаў на гэта пытанне вельмі адназначна: «Калі вы працуеце ў Tik­Tok, у вас ёсць толькі некалькі секунд, каб прыцягнуць увагу чалавека».

Кароткія відэа з’яўляюцца ідэальным фарматам для хуткай перадачы ключавых пасылаў. Важна ўмець захапіць увагу з першых секунд і перадаць асноўную думку як мага хутчэй. Гэта асабліва актуальна ў сучасных умовах, калі час увагі спажыўцоў інфармацыі надзвычай малы.

Эрыка Марзана таксама падкрэсліла, што ў Deutsche Welle самым паспяховым кантэнтам у сацыяльных сетках сталі кароткія і дынамічныя відэа да 60 секунд. Пры гэтым важна не ахвяраваць якасцю кантэнту дзеля яго хуткасці. «Мы ствараем некалькі відэа на адну тэму, каб ахапіць усе аспекты і не згубіць глыбіні», — падкрэсліла Марзана. Такім чынам, можна данесці складаную інфармацыю паэтапна, не перагружаючы аўдыторыю.

Як ствараць аўтэнтычны і даверлівы кантэнт, калі журналісты працуюць у эміграцыі?

Для беларускіх СМІ пытанне аўтэнтычнасці стаіць асабліва востра. Многія журналісты працуюць у эміграцыі, і гэта можа ствараць дадатковыя бар’еры ў пабудове даверу з аўдыторыяй. Ці магчыма ствараць сапраўдны і аўтэнтычны кантэнт у такіх умовах?

Марзана падкрэсліла, што ў сучасным свеце аўтэнтычнасць з’яўляецца асновай даверу. Людзі хочуць бачыць сапраўдных людзей, а не фармальныя выступленні ад асобы брэндаў.

«Аўтэнтычнасць — гэта тое, чаго чакае маладое пакаленне. Яны давяраюць кантэнту, калі бачаць, што ён створаны для іх, а не дзеля прафесіяналізму», — адзначыла Марзана.

Для беларускіх СМІ гэта значыць, што варта засяродзіцца на прамых зносінах з аўдыторыяй. Нефармальныя інтэрв’ю, стрымы, дзе журналісты адказваюць на пытанні ў рэальным часе, могуць стаць асновай для пабудовы даверу. Аўтэнтычнасць заключаецца не толькі ў змесце, але і ў форме падачы — чым больш натуральна і чалавечна выглядае кантэнт, тым больш шанцаў, што ён знойдзе водгук у аўдыторыі.

Як працаваць з каментарыямі і ўзаемадзейнічаць з супольнасцямі?

Сацыяльныя сеткі — гэта не толькі пляцоўка для трансляцыі кантэнту, але і прастора для зносін і ўзаемадзеяння з аўдыторыяй. Але ці заўсёды ўзаемадзеянне з каментарыямі прыносіць плён, асабліва калі мова ідзе пра крытыку або тролінг?

На палях Wis­la Video Forum. Верасень 2024 года. Фота: аўтара БАЖ

Эрыка Марзана лічыць, што праца з каментарыямі — гэта не проста адказ на заўвагі, а цэлая стратэгія па ўзаемадзеянні з аўдыторыяй.

«У Deutsche Welle мы стараемся ўключаць пытанні нашых гледачоў у новыя відэа, ствараючы кантэнт, які грунтуецца на тым, што цікавіць нашу аўдыторыю», — расказала выступоўца. Гэта не толькі павышае лаяльнасць гледачоў, але і дазваляе наладзіць блізкія адносіны з супольнасцю.

Для беларускіх медыяў гэта можа стаць эфектыўным спосабам наладзіць зваротную сувязь і павысіць давер сярод чытачоў. Улічваючы абмежаваны доступ да аўдыторыі ўнутры Беларусі, сацыяльныя сеткі могуць стаць адным з асноўных інструментаў для ўзаемадзеяння з грамадствам і абмену думкамі.

Як адаптавацца да хутка змяняльных трэндаў?

Сацыяльныя сеткі — дынамічнае асяроддзе, дзе трэнды і фарматы змяняюцца амаль кожны месяц. Ці варта беларускім медыям хутка падладжвацца пад новыя трэнды, ці можна заставацца на традыцыйных фарматах?

Джэрэмі Скiт падкрэсліў, што важна не толькі ісці ў нагу з трэндамі, але і разумець, чаму яны з’яўляюцца. Напрыклад, сёння Tik­Tok актыўна прасоўвае доўгія відэа, але гэта не значыць, што медыі павінны адразу пераходзіць на 10-хвілінныя ролікі.

«Сацыяльныя сеткі — гэта ў першую чаргу бізнес, і новыя функцыі звычайна звязаны з іх жаданнем павялічыць прыбыткі. Мы ж, як журналісты, павінны засяроджвацца на тым, што лепш для нашай аўдыторыі», — падсумаваў эксперт.

Марзана дадала, што эксперыменты з новымі фарматамі варта праводзіць, але без страты якасці кантэнту. «Мы павінны прымаць новаўвядзенні, але не ісці на кампрамісы ў плане якасці і аўтэнтычнасці», — падкрэсліла яна.

Яшчэ некалькі вельмі кароткіх парад:

• Псіхалагічны і эмацыйны складнік — кантэнт павінен выклікаць эмоцыі, каб прыцягваць увагу і заставацца ў памяці.
• Мультыфарматнасць — выкарыстоўвайце розныя фарматы (відэа, інфаграфіка, тэксты) для розных платформаў.
• SEO для сацыяльных сетак — аптымізуйце загалоўкі і хэштэгі для паляпшэння бачнасці кантэнту.
• Кантэнт-калабарацыі — супрацоўнічайце з іншымі медыямі і блогерамі для павелічэння ахопу аўдыторыі.
• Выкарыстанне AI і аўтаматызацыі — выкарыстоўвайце інструменты штучнага інтэлекту для павышэння эфектыўнасці працы.
• Манетызацыя і этыка — развівайце каналы манетызацыі, не забываючы пра якасць і этычнасць кантэнту.
• Анлайн-бяспека — асаблівая ўвага анлайн-бяспецы і кіраванню рэпутацыяй.

Вопыт BBC і Deutsche Welle, які прадставілі Джэрэмі Скiт і Эрыка Марзана на Wis­la Video Forum, падкрэслівае, што сацыяльныя сеткі сёння з’яўляюцца неад’емнай часткай стратэгіі любога медыя. Для беларускіх СМІ, якія працуюць у асаблівых умовах, гэтыя рэкамендацыі могуць стаць важным кіраўніцтвам да дзеяння.

Беларускія журналісты могуць адаптаваць міжнародны вопыт пад свае рэаліі, робячы акцэнт на аўтэнтычнасць, хуткасць падачы і інтэрактыўнасць. Сацыяльныя сеткі прапануюць унікальныя магчымасці для прасоўвання медыя і ўзаемадзеяння з аўдыторыяй, якія могуць стаць ключом да поспеху ў сучасных умовах.