Адукацыйная праграма «Курс на каштоўнасці» (дедлайн — 13 жніўня)

У свеце, які ўвесь час змяняецца, нам неабходна на нешта абапірацца ў сваёй дзейнасці. Нам патрэбна нешта, каб не даць плыні навінаў і падзей збіць нас з абранага курсу. Адно з магчымых апірышчаў — нашыя каштоўнасці. 

Чаго чакаць

Па выніках праграмы ты:

• Даведаешся, што такое правы чалавека, інклюзія, гендарная роўнасць і экапрыязнасць

• Разбярэшся чаму пералічаныя каштоўнасці называюцца скразнымі і якое дачыненне маюць да тваёй дзейнасці

• Навучышся ўключаць каштоўнасці ў сваю працу і рэалізоўваць іх праз сваю дзейнасць

• Зразумееш, чаго сапраўды чакае донар у праектнай заяўцы, калі запытваецца цябе пра рэалізацыю скразных каштоўнасцяў

• Зменіш дзейнасць сваёй арганізацыі ці ініцыятывы, абапіраючыся на каштоўнасці

• Будзеш мець магчымасць з нашай падтрымкай укараніць каштоўнасці ў працу сваёй арганізацыі ці ініцыятывы

Эксперт_кі

Марына Штрахава, сузаснавальніца арганізацыі ІншыЯ, мэнэджарка сацыяльных праектаў, прыхільніца скразных каштоўнасцяў

Зміцер Радзіеўскі, сузаснавальнік і дырэктар арганізацыі ІншыЯ 

Марыя Ландо, трэнерка-кансультантка па развіццю арганізацый грамадзянскай супольнасці

Марына Ментусава, феміністка, CEO Gen­der Equal­i­ty Man­age­ment, CEO & co-founder Safe Skills School, калумністка Forbes Women, вядучая шоў «Женщины Тяжелого Поведения»

Таццяна Кузняцова, экалагістка, мэнэджарка экалагічных праектаў, аўтарка курсаў Школы «Экаідэі» і матэрыялаў Ecoidea.me

Для каго

• Праграма разлічана на беларускіх актывіст_ак, якія могуць уплываць на прыняцце рашэнняў у сваіх арганізацыях і/ці ініцыятывах

• Тыя, хто гатовы да зменаў у сваёй працы. Праграма максімальна скіравана на практычнае прымяненне ведаў адразу пад час адукацыі.

• Праграма будзе праходзіць анлайн, таму нам не прынцыпова ў якой краіне ты будзеш знаходзіцца падчас адукацыі.

Як будзе праходзіць

Праграма будзе праходзіць з 1 верасня да 21 снежня 2023 і складаецца з двух частак:

1. Адукацыйная частка з 01.09 па 31.10. Яна ўключае самастойнае вывучэнне тэорыі на анлайн-платформе (відэа, тэксты і інш.), а таксама практычныя заняткі ў Zoom 1 раз на тыдзень — чацвер 19:00 (па мінскім часе) — працягласцю 1,5 гадзіны. Пасля кожнага тэматычнага модуля запланавана невялікае практычнае заданне, выкананне якога будзе спрыяць падрыхтоўцы плана зменаў у тваёй арганізацыі ці ініцыятыве і зойме ад 15 хвілін да гадзіны. 

2. Практычная частка з 01.11 па 21.12. Яна ўключае рэалізацыю падрыхтаванага плану зменаў на карысць рэалізацыі каштоўнасцяў. Каманда праграмы будзе дапамагаць у рэалізацыі планаў рознымі спосабамі.

Для паўнавартаснага ўдзелу спатрэбіцца каля 5 гадзін на тыдзень. Найбольш зручна будзе ўдзельнічаць з камп’ютара ці ноўтбука, а для некаторых сесій дадаткова можа спатрэбіцца смартфон. 

Мовы праграмы: беларуская і руская.

Падрабязная праграма.

Удзельні_цы, якія паспяхова завершаць хаця б адну з частак праграмы, атрымаюць сертыфікаты.

Як трапіць

Каб навучацца на праграме, неабходна запоўніць анкету https://forms.gle/NuQpTZ33T2MCZ9uQA да 23:59 13 жніўня. Не пазней за 21 жніўня ты атрымаеш адказ пра вынікі адбору на пошту, якую пазначыш пры запаўненні анкеты. Колькасць месцаў абмежаваная, таму мы пакідаем за сабою права абіраць удзельн_іц, сыходзячы з той інфармацыі, што будзе прадстаўленая ў анкетах. Пры патрэбе ўдакладнення інфармацыі мы звяжамся дадаткова па пазначаных кантактах.

Калі ў цябе ўзніклі пытанні па правядзенні праграмы — смела пішы на пошту info@theothersby.org з пазнакай у тэме ліста «Курс на каштоўнасці».