Канада падтрымае беларускія незалежныя СМІ

Канада у партнёрстве з арганізацыяй «Журналісты за правы чалавека» будзе дапамагаць незалежным медыям з Беларусі і Расіі. Пра гэта стала вядома падчас сустрэчы Святланы Ціханоўскай з міністаркай замежных спраў Канады Мелані Жалі.

Сустрэча адбылася 15 красавіка 2024 года ў Атаве. Ціханоўская і Жалі абмеркавалі падтрымку беларускімі ўладамі расейскай агрэсіі і дамовіліся правесці двухбаковыя кансультацыі па пытаннях правоў чалавека, дэмакратыі і адказнасці рэжыму Лукашэнкі. Падчас сустрэчы кіраўніца канадскага МЗС паведаміла, што краіна мае намер падтрымліваць беларускія незалежныя медыі.

«Міністр Жалі пацвердзіла прыхільнасць Канады да прасоўвання свабоды слова і супрацьдзеяння маніпуляванню інфармацыяй і дэзінфармацыі. Яна аб’явіла, што Канада нядаўна падпісала партнёрства на 1 мільён долараў з арганізацыяй «Журналісты за правы чалавека», мэтай якога з’яўляецца аказанне дапамогі расійскім і беларускім незалежным журналістам у барацьбе з маніпуляваннем інфармацыяй», — гаворыцца ў прэс-рэлізе канадскага ўрада.