Экс-міністра інфармацыі Беларусі хочуць прызначыць «сенатарам»

У Брэсцкай вобласці завершанае вылучэнне кандыдатаў у члены Савета Рэспублікі: усяго прапанавана восем прэтэндэнтаў у «сенатары». Паколькі менавіта такой і з’яўляецца квота ад рэгіёна, амаль няма сумневаў, што ўсе прапанаваныя асобы будуць прызначаныя ў так званую верхнюю палату беларускага парламента.

Ігар Луцкі. Фота: «Гродзенская праўда»

У спіс вылучэнцаў трапіў і Ігар Луцкі, які родам са Століна, быў звязаны з дзяржаўнымі СМІ, а апошнім часам займае пасаду намесніка кіраўніка адміністрацыі Аляксандра Лукашэнкі.

Ігар Луцкі нарадзіўся ў 1972 годзе. Ён скончыў факультэт радыёфізікі і электронікі Беларускага дзяржаўнага ўніверсітэта, але даволі працяглы час адпрацаваў у дзяржаўнай медыяпрасторы.

З афіцыйнай біяграфіі Ігара Луцкага вынікае, што ў 2004—2006 гадах ён займаў пасаду намесніка дырэктара інфармагенцтва БелТА. Пасля гэтага быў дырэктарам «Новага радыё» (2006–2008), уладальнікам якога з’яўляецца Федэрацыя прафсаюзаў Беларусі. У 2008 годзе ён вярнуўся ў БелТА на пасаду першага намесніка дырэктара і адпрацаваў каля шасці гадоў. У 2014 годзе Ігара Луцкага прызначылі першым намеснікам міністра інфармацыі Беларусі, а яшчэ праз чатыры гады чыноўнік стаў генеральным дырэктарам тэлеканала «Сталічнае тэлебачанне».

Далей яго службовая кар’ера развівалася вельмі імкліва. 4 чэрвеня 2020 года, за некалькі месяцаў да прэзідэнцкіх выбараў, з’явіўся ўказ, паводле якога Луцкі ўзначаліў міністэрства інфармацыі. Але міністрам ён быў менш за год: з 5 красавіка 2021 года ўраджэнец Століна займае пасаду намесніка кіраўніка адміністрацыі Аляксандра Лукашэнкі. Пакуль гэта і ёсць цяперашняе месца працы чыноўніка.

 У беларускай медыясупольнасці дзейнасць Ігара Луцкага звязаная з моцным ціскам на недзяржаўную прэсу. У чэрвені 2022 года ён сам распавядаў пра асабісты ўнёсак у справу, паводле якой інтэрнэт-партал TUT.BY быў закрыты і прызнаны «экстрэмісцкай арганізацыяй».

За свае ўчынкі на дзяржаўных пасадах Ігар Луцкі ў 2020–2021 гадах трапіў у санкцыйны спіс Еўразвяза і некаторых іншых дзяржаў.