Івашын: пра нас пішуць чарговыя паклёпы агенты Лубянкі

Пра маладзёна было напісана, што ён з’яўляецца штатным супрацоўнікам СБУ і агентам Дзярждэпа ЗША. Дзяніс Івашын кажа, што падобныя пасквілі з’яўляюцца ў сеціве 2–3 разы на месяц:

— Гэта цягнецца ўжо амаль год. Гэтыя спробы дыскрэдытаваць і ачарніць нашую супольнасць адбываюцца як у дачыненні да мяне, так і да нашага заснавальніка Рамана Бурко. Стаяць за гэтым прарасійскія сілы. У прыватнасці, адзін з рэдактараў Life­News, каардынатар расійскага  Антымайдана Вечаслаў Раўжын. Менавіта адтуль растуць ногі. Увесь час яны спрабуюць выявіць нашую датычнасць да спецслужбаў Украіны, да Узроеных сілаў Украіны. Называюць нашыя “званні”. Мы выступаем у якасці ці то капітанаў, ці то маёраў, ці то падпалкоўнікаў. Увесь час яны блытаюць свае пазіцыі і не могуць прыйсці да адзінай высновы хто мы насамрэч ёсць. Ці то агенты СБУ, ці то штатныя супрацоўнікі Узброеных сілаў Украіны, ці ўвогуле агенты Дзярждэпа ЗША. Гэта сведчыць пра тое, што яны самі заблыталіся ва ўласных паказаннях і не могуць выпрацаваць генеральную лінію. Бо не разумеюць, што людзі проста не давяраюць іхным выбрыкам. Яны спрабуюць увесь час стварыць нейкую новую інфармацыйную нагоду, але людзі проста прызвычаіліся і на іх не рэагуюць. Гэта проста нейкае трызненне “маладых стажораў Лубянкі”.

Па словах Дзяніса Івашына, на артыкулы, што змяшчае Inform­na­palm, добра рэагуюць замежныя СМІ: ВВС ды «Нямецкая хваля». Амаль усе артыкулы перадрукоўвае «Хартыя-97» ды іншыя беларускія СМІ. Гэтыя тэксты дзейнічаюць як “чырвоная ануча” быку для расійскіх прапагандыстаў.

Дзяніс Івашын стаў частым госцем на тэлеканале «Белсат», дзе ён выступае ў якасці эксперта разам з Уладзімірам Мацкевічам і абмяркоўвае пагрозы нацыянальнай бяспекі Беларусі.