Журналіста Ігара Карнея пачнуць судзіць 19 сакавіка

Судовы працэс распачнецца а 10‑й раніцы ў Мінскім гарадскім судзе. Весці справу прызначаны суддзя Сяргей Кацэр. Ігара Карнея вінавацяць паводле ч. 3 арт. 361–1 Крымінальнага кодэкса (удзел у экстрэмісцкім фарміраванні).

Пакараннем паводле гэтага артыкула можа быць абмежаванне волі на тэрмін да чатырох гадоў альбо пазбаўленне волі на тэрмін ад двух да шасці гадоў.

Ігара Карнея затрымалі пасля ператрусу ў ягонай кватэры 17 ліпеня 2023 года — як было абвешчана сваякам, на 10 сутак.  Падчас ператрусу сілавікі  забралі камп’ютар і іншыя лічбавыя носьбіты інфармацыі, а журналіста адвезлі ў ізалятар часовага ўтрымання на Акрэсціна.

Праваабаронцы зрабілі выснову, што Карней затрыманы ў межах крымінальнай справы, і таму праз 10 дзён яго мусяць альбо вызваліць, альбо прад’явіць абвінавачанне. Па сканчэнні гэтага тэрміну на волю Ігар Карней не выйшаў, з ІЧУ яго перавялі ў мінскі СІЗА № 1.

Ігар Карней працаваў ў журналістыцы са студэнцкіх гадоў. Напрыканцы 80‑х  разам з сябрамі і аднадумцамі ён стварыў у Оршы моладзевую незалежную газету «Лидер». Таксама друкаваўся ў газетах «Знамя юности», «Чырвоная змена», «Комсомольская правда», з 1991 года працаваў у газеце «Звязда». У 1994–2000 гадах быў карэспандэнтам штотыднёвіка «Свободные новости». У 2000 годзе прыйшоў на «Радыё Свабода». У апошнія гады працаваў як журналіст-фрылансер.

Вядома, што 15 лістапада 2020 года Ігара Карнея затрымлівалі падчас аднаго з мірных маршаў у Мінску. Тады яго пакаралі 10 суткамі адміністрацыйнага арышту, якія ён адбываў у ізалятары часовага ўтрымання ў Жодзіне.