Хлопец прапанаваў дапамогу блогеру — да яго адразу прыехала міліцыя

22 сакавіка Яўген Грыцок, жыхар Акцябрскага, што на Гомельшчыне, пад відэа ў групе «Рудабельская паказухі» «вКонтакте» пад просьбай дапамагчы сродкамі на камп’ютарную тэхніку, напісаў, што можа аддаць свой камп’ютар, якім не карыстаецца, каб блогер Андрэй Павук мог мантаваць і выкладваць свае ролікі.

«Вельмі люблю Павука і падтрымліваю яго», — кажа Грыцок «Белсату».

Праз некалькі гадзінаў да ягонай сям’і прыехалі чацвёра міліцыянтаў. На пытанне пра мэту візіту міліцыянты адказалі, што хацелі папрасіць Яўгена, каб ён не не дапамагаў Андрэю Павуку.

«Бабуля кажа, што яны вельмі груба ламаліся ў кватэру. Калі ўвайшлі, то пачалі распытваць, дзе я і калі прыеду», — працягвае Яўген.

Яўген Грыцок – нарадзінец Баранавічаў. Ягоная сям’я жыве ў Акцябрскім. Год таму юнак пачаў працаваць у Маскве ахоўнікам. Паводле ягоных словаў, учорашні візіт міліцыі бабуля ўспрыняла блізка да сэрца.

«Яна думала, што, магчыма, нешта са мной здарылася ў Маскве, і прыйшлі дакументы ў Беларусь, — распавядае Грыцок. — У яе падскочыў ціск — я яе адзіны ўнук».

Паводле хлопца, адзін з ягоных аднакласнікаў працуе цяпер у Кастрычніцкім РАУС, але на прыватнае пытанне, што яны робяць, той нічога не адказаў.

«Я сам выкладваю гумарыстычныя ролікі на Youtube, калі яны прыедуць у наступны раз, я ўсталюю ў кватэры маленькія экшн-камеры і паспрабую зняць тое, пра што яны будуць мяне пытаць», — дадае Яўген.

Андрэй Павук вядомы як аўтар відэаблогу «Рудабельская паказуха», у якім распавядае пра жыццё ў сваім родным Акцябрскім. Сябар Беларускай асацыяцыі журналістаў.

На гэтым тыдні супраць Павука завялі крымінальную справу паводле артыкулу аб ілжывым мініраванні, у ягонай кватэры правялі вобшук і забралі тэхніку.

Пасля таго, як Павук напісаў пра візіт міліцыянтаў да Яўгена Грыцока ў сацыяльных сетках, сваю дапамогу блогеру прапанаваў былы палітзняволены Мікалай Дзядок.