Гродзенцы прымаюць WATCH DOCS BELARUS

Усе фільмы гэтага года прысвечаныя постсавецкай прасторы. Пра іх адметнасці распавядае арганізатар фестывалю Вольга Галецка:

— Гэта будуць фільмы, звязаныя з правамі чалавека. Для Цэнтральнай Еўропы, дзе фестываль пачаўся — гэта вельмі важна, таму што фестывалі па правах чалавека неяк звязаныя з таталітарнай сістэмай, яны пра гэту сістэму распавядаюць.

Напрыклад, эстонскі фільм пра выбары. Фільм пра катастрофу на Саяна-Шушанскай ГЭС у Расіі, што вельмі актуальна для Беларусі, бо шмат хто параўноўвае гэтую аварыю з аварыяй у Чарнобылі. У нас таксама будзе фільм пра музей у ГУЛАГу. У стужцы паказаны падыход дзяржавы да гэтага, і што хочуць людзі, якія ў гэтым ГУЛАГу знаходзіліся.

— Што для вас такія паказы і чаму вы вырашылі імі займацца?

— Я ніяк не звязана з абаронай правоў чалавека. Мне цікава, таму што я бачу, што ёсць шмат праблем, якія не абмяркоўваюцца ў Беларусі, якія напэўна трэба абмяркоўваць. І я проста глыбока веру ў тое, што калі людзям даць такі штуршок, пачаць – гэта хваля пойдзе далей.

— У гэтым годзе фэст ладзіцца амаль на ўсіх незалежных пляцоўках. З чым гэта звязана?

— Я за тое, каб прыцягваць да такіх фэстаў як мага больш людзей. Мне здаецца, калі мы будзем ладзіць фэст на розных пляцоўках, то прыцягнем вельмі розных людзей, якія магчыма не прыйшлі б у іншае месца. Напрыклад, новае месца правядзення сёлетняга фэста – гэта тайм-кавярня “Партал”, дзякуючы яму мы пакажам гэтае кіно зусім новым людзям.

Пра свае першыя ўражанні пра фестываль WATCH DOCS BELARUS распавядае сябра ГА “БАЖ” Аляксандр Саенка:

— Мне ў Гродне вельмі не хапае фэстаў дакументальнага кіно, арт-хаўза, таму што ў гродзенскіх кінатэатрах паказваюць толькі блокбастары, нейкія камедыі і баявікі. А кіно, дзе можна было б пабачыць нейкія сацыяльныя гісторыі, важныя падзеі і эпохі, – іх амаль няма. Першы фільм фестывалю пра катастрофу на Саяна-Шушанскай ГЭС — поўнасцю была паказаная ўся гісторыя трагедыі. Я амаль нічога не ведаў пра гэтую аварыю, і для мяне гэта было вельмі цікава.

Для паказу фестывальных кінастужак у 2017 годзе задзейнічаныя такія пляцоўкі як “Цэнтр гарадскога жыцця”,  “Дом 46”,  веган-бар “Несцерка”, цэнтр “Трэці Сектар”, дзе кожны дзень будуць адбывацца апроч паказаў фільмаў розныя майстар-класы і лекцыі.