Гомельскі журналіст назваў чыноўніцу рабой. Яго апраўдалі

Агучаную пастанову шматлікія прысутныя, якія прыйшлі падтрымаць журналіста, сустрэлі воплескамі.

Суддзя Алеся Осіпава патлумачыла, што прыкметамі абразы, паводле артыкула 9.3 КаАП, з’яўляецца непрыстойная форма – лаянка, нецэнзурныя выказванні.

У пратаколе не згадваецца, якія менавіта выказванні былі ўжыты журналістам. Сведка Аляксей Атрошчанка і супрацоўнік міліцыі Дайнэка сышліся ў меркаваннях, што ў дачыненні да Шлапаковай Жукоўскі ўжыў выраз: “Вы – раба”.

Чыноўніца ж абгрунтавала ў судзе сваю абразу двума азначэннямі: па яе меркаванні, Кастусь Жукоўскі сказаў словы “раба” і “крымінальнікі”.

– Суддзя, адхіліўшы хадайніцтва Жукоўскага на правядзенне лінгвістычнай экспертызы, сама вызначыла, што на адрас чыноўніцы не было непрыстойных слоў і выказванняў. “Раба” – гэта літаратурнае слова, – лічыць гомельскі прадстаўнік ГА “Беларуская асацыяцыя журналістаў” Леанід Судаленка.

Нагадаем, што інцыдэнт у райцэнтры Акцябрскі (Гомельская вобласць) здарыўся ў сярэдзіне снежня. Жукоўскі разам з калегам Аляксеем Атрошчанкам здымаў будынак райвыканкама. Падчас здымкаў да яго і падышла жанчына з прэтэнзіямі, патрабавала пасведчанне і акрэдытацыю.

– Гэтай жанчыне (цяпер я ведаю – Шлапаковай) недзе на чацвёрты раз я і сказаў: Што вы хочаце? Вы – раба, слуга народу. Адчапіцеся! – гаворыць журналіст. На такую рэпліку Валянціна Шлапакова выклікала міліцыю, якая і падрыхтавала ў суд пратакол за абразу чыноўніцы.

Цяпер фрылансер Жукоўскі заяўляе, што не пашкадуе грошай і купіць відэарэгістратар, каб браць з сабою ў паездкі па рэгіёне:

– Відэарэгістратар дазволіць справядліва разбірацца ў падобных інцыдэнтах, асабліва, калі няма сведкаў, – дадае Жукоўскі.