Гомельскага журналіста выклікаюць адразу ў два пастарункі

Спачатку журналісту патэлефанаваў на мабільны ўчастковы інспектар Калінкавіцкага РАУС маёр Уладзімір Паўловіч і запатрабаваў 28 снежня а 10‑й гадзіне прыехаць у міліцыю. Праваахоўныя органы хочуць скласці адміністрацыйны пратакол за тое, што Жукоўскі браў у людзей відэакаментары, якія выкарыстаў спадарожнікавы тэлеканал “Белсат” у сваім сюжэце ад 18 лістапада. Сюжэт быў пра збіццё калінкавіцкімі футбольнымі заўзятарамі маладзёна з Жыткавічаў.

Пасля тэлефанаванне журналісту паступіла ад старшага ўчастковага інспектара, маёра міліцыі з Кармянскага РАУС Аляксандра Марозава. Той таксама запатрабаваў прыехаць 28 снежня для тлумачэнняў і складання адміністрацыйнага пратакола, але ўжо за іншы сюжэт на “Белсаце” – “Жыхары Кармы без вады з лістапада”.

Па словах фрылансера, у абодвух выпадках  участковыя маёры заяўлялі, што  ён не меў права рабіць відэаздымкі  для замежнага спадарожнікавага тэлеканала, бо не мае акрэдытацыі ў беларускім МЗС у якасці карэспандэнта замежнага СМІ.

Жукоўскі ўдакладніў, што ад лістапада ён зарэгістраваны як індывідуальны прадпрымальнік, займаецца стварэннем інфармацыйных матэрыялаў, у тым ліку і відэа. Беларускае заканадаўства і  міжнародныя пагадненні, якія падпісала Беларусь, гарантуюць грамадзянам права на збор і распаўсюд інфармацыі. Акрэдытацыя ў знешнепалітычным ведамстве не патрабуецца, бо Жукоўскі не з’яўляецца штатным супрацоўнікам “Белсата”.

У гутарцы з «Беларускім Радыё Рацыя» журналіст заявіў, што не паедзе ні па адным з выклікаў, бо яму трэба працаваць, а дарожныя выдаткі яму ніхто не кампенсуе.

Сёлета на падставе пратаколаў міліцыі раённыя суды шэсць разоў штрафавалі Кастуся Жукоўскага за нібыта незаконны выраб прадукцыі СМІ без акрэдытацыі для тэлеканала “Белсат”. Агулам сума штрафаў яму склала 31,5 мільёна рублёў.