Глыбоцкая раёнка адарыла паштальёнаў прасамі

Глыбоцкая раённая газета «Веснік Глыбоччыны» ўручыла паштальёнам прасы і напісала пра гэта артыкул. Галоўны рэдактар Андрэй Панкрат паведаміў, што гарадскія, сельскія паштальёны, грамадскія распаўсюднікі — гэта першыя памочнікі ў арганізацыі падпіскі на газету.

Фота: vg-gazeta.by

Цяпер як раз ідзе актыўная агітацыя паштовай падпіскі на раёнкі Віцебскай вобласці.

«Рэдакцыя, у сваю чаргу, імкнецца забяспечыць найбольш спрыяльныя ўмовы для правядзення падпісной кампаніі. Адна з форм такой працы — аб’ява конкурсу сярод сельскіх, гарадскіх паштальёнаў і грамадскіх распаўсюднікаў», — кажа Панкрат.

Па выніках падпіскі на першы квартал і першае паўгоддзе 2024 года пераможцамі конкурсу сталі: паштальён вёскі Зябкі Алена Грэміцкіх, гарадскі паштальён Людміла Рымкевіч і грамадскі распаўсюднік Глыбоцкага псіханеўралагічнага дома-інтэрната для састарэлых Алена Маісеева. За гэта ім уручылі электрапрасы.

Як піша сайт «Веснік Глыбочыны», пераможцы быццам у адзін голас цвердзяць, што глыбачане найперш выпісваюць раённую газету, а ўжо потым усе астатнія выданні, і што лепшай крыніцы інфармацыі пра жыццё Глыбоччыны не знайсці. Паводле паштальёна Алены Грыміцкіх, сабраць падпіску на раёнку не складае асаблівай цяжкасці.

«Зразумела чаму — таму што ніякай альтэрнатывы ўжо не засталося. У раёне ды ўвогуле ў краіне знішчылі ўсе незалежныя выданні, а раёнку прымушаюць выпісваць усіх працаўнікоў мясцовых прадпрыемстваў. Ды і ў пенсіянераў выбару больш няма. Тыя, хто раней выпісваў і купляў даволі папулярную ў раёне незалежную газету «Вольнае Глыбокае», зрабіць гэта ўжо не могуць», — заўважаюць глыбачане.