Гарэлка, кнігі, кіно: рэклама ў беларускіх газетах 100 гадоў таму

Пра што распавядала рэклама ў беларускіх газетах сто гадоў таму? За гэты час мы амаль не змяніліся, беларусам цікава ўсё тое ж. «Новы Час» пагартаў розныя выданні.

Рэкляма ў Беларускай Крыніцы. 1925 год

Пісулькі

Выданьне Беларускае жыцьцё ў 1919 годзе паведамляла:

Хутка паявяцца Пісулькі з партрэтамі беларускіх пісьменьнікаў (выдавецтва Беларускага Жыцьця).

У першы чарод друкуюцца пісулькі з партрэтамі: В. Дуніна-Марцінкевіча, Я. Купалы, А. Гаруна, Я. Лёсіка, З. Бядулі.

Цана кожнай пісулькі 25 фэнігаў.

Купляць можна ў Рэдакцыі Беларускага Жыцьця (Сьв. Міхальскі завулак 2, кв. 16) і ў Беларускай Кнігарні (Завальная 7).

Ці пайшлі б вы ў 2024 годзе ў кнігарню за Пісулькамі з выявамі сучасных літаратараў?

Тая ж рэкляма, толькі пазьней. Кошт ужо не ў фэнігах, а капейках

Лякарня

Орган Беларускай Хрысьціянскай Дэмакратыі – Беларуская Крыніца ў 1925 годзе зьмясьціла рэкляму мэдычнай установы:

Лякарня Літоўскага Таварыства Санітарнае Помачы

Вільня, Віленская вуліца 28

У абмуляторыі прымаюць дактары-спецыялісты: дзіцячыя хваробы – ад 3 да 4 гадзінаў, унутраныя хваробы 10–4, хірургічныя 1–2, жаночыя 11–1, вачэй 11–2, вушэй, носа, горла 2–3, зубоў 10–11, скуры і венэрычныя 2–3, нэрваў 1–2.

У лякарні аддзелы: унутраны, хірургічны, гінекалягічны і радзільны.

Кабінэт Рэнтгена і Электра-Медычны: Лячэньне праменьнямі, фатаграфаваньне, прасьвятленьне, электрычныя ванны, электрычны масаж.

Аналітычная Лябараторыя.

Газэта Беларусь. 1919 год

Рэстаран

Беларускае жыцьцё ў 1919 годзе пісала пра жыцьцёва неабходнае:

Беларускі рэстаран «Стэлла», былы «Т‑во Афіцэраў» (Міцкевічава вул. 83, проці нямецкай кірхі).

ЗНОЎ АДЧЫНЕН

Цэны: Сьнеданьне – 5 руб. Абеды з 2‑х страваў – 8 руб. Вячэры з 2‑х страваў – 10 руб. І порцыямі.

Адпускаецца розная гарэлка.

У часе абеда граець канцэртны квартэт ад 1 да 4 гадзіны і ў вечары ад 7 1/2 да 11 гадзіны.

Белорусский фотограф зафиксировал, как выглядели наши предки в начале ХХ века — редкие кадры из архива Александра Сержпутовского

Нэаполь

Тое ж выданьне ў 1920 годзе рэклямавала іншы рэстаран:

Успомніце мінуўшчыну!

Усё як перад вайной!

Найстарэйшая кавярня «Нэаполь» ізноў адчынена ў падворку ў старым памяшканьні: Францішканская (Губэрнатарская) 10.

Сьнеданьні, абеды, вячэры, гарбата, кава, какао і розныя закускі па найдзешавейшай цане.

Паважаныя кліенты, якія заўсёды хадзілі ў свой стары сямейны «Нэаполь», маю надзею, што і далей будуць да нас хадзіць.

З пашанай М. Найман.

Беларускае Жыцьцё. 1920 год

Вальготна пасядзець

Газэта Беларусь у 1919 годзе не адстае ад калегаў, і прапануе рэкляму цікавага месца ў Менску:

Дзе весела і вальготна пасядзець?

Пэўня ж у рэстаране павільёне На Гарадзкім Скверы.

У цяні дрэў, пад шатамі пахучага бэзу можна

Смачна пасьнедаць, сытна паабедаць, добра павячэраць.

Зыкі чаруючага аркестру песьцяць слух.

Пахучая гэрбата, смачная кава, натуральная чакаляда і какао.

Размаітыя закускі. Найлепшыя трункі. Найлепшая правізія.

Танна, прытульна, весела.

Вольная Беларусь. 1917 год

Гімназія

Газэта Беларуская Думка ў чэрвені 1919 года падавала наступную рэкляму:

І‑ая Віленская Беларуская Гімназія (для дзяўчат і хлапцоў)

Востра-Брамская 9.

Прыймовыя экзамены ўва ўсе 8 клясаў і 2 прыгатаваўчых ад 24 па 28 чэрвеня гэтага года, а пасьля канікул з 20 жніўня.

Пачатак вучэбных заняцьцяў 1 верасьня г.г.

Прыйманьне просьбаў ў канцэлярыі гімназіі штодзённа ад 11 да 1 гадзіны апрача сьвят.

Газэта Беларусь. 1919 год

Кнігі

Беларуская Крыніца ў 1925 годзе зьмясьціла некалькі рэклямаў, датачных кнігаў:

Выйшаў з друку і прадаецца ў Вільні, Завальная 7.

Новы Беларускі Малітвеньнік

для Беларусаў-Каталікоў

У звычайнай аправе каштуе 3 злотых.

Газэта Наша Думка. 1921 год

Танная прадажа кніжак

З уступкай на палавіну, або 50%

Беларуская кнігарня ў Вільні, Завальная вуліца 7

Даводзіць да ведама ўсяго беларускага грамадзянства, што ладжаныя кнігарняй так званыя «Два тыдні таннай беларускай кніжкі» дзеля просьбаў многіх сялянаў прадаўжаюцца да 5 студзеня 1926 году з тэй мэтай, каб кожны селянін-беларус мог мець магчымасьць набыць сабе патрэбныя кніжкі на сьвята.

Дык адрасуйце: Вільня, Завальная 7 Беларуская Кнігарня.

Увага! Кніжкі высылаюцца толькі па атрыманьні належнай сумы, або задатку ня меней 1/3 вартасьці кніжак. Усім тым, што прыслалі заказы, а не прыслалі грошаў, кніжкі ня будуць высылацца аж да атрыманьня належных грошаў.

Выйшла кніга артыкулаў «Савецкай Беларусі» часоў рэдактарства Міхася Чарота