Фатографа Андрэя Шаўлюгу арыштавалі на 15 сутак. Падрабязнасці затрымання і суда

У аўторак працягнуўся суд над фатографам БелаПАН Андрэем Шаўлюгам. Яго затрымалі падчас асьвятленьня маршу пратэсту падзеяў 15 лістапада і абвінавацілі ва ўдзеле ў несанкцыянаваным масавым мерапрыемстве. Ён знаходзіцца ў ЦІП на Акрэсьціна.

Адвакат прадставіў судзьдзі копію дамовы з гатэлем «Арбіта», рэдакцыйныя заданьне і пасьведчаньне ад агенцтва БелаПАН, фотаздымкі, апублікаваныя агенцтвам, зробленыя Андрэям Шаўлюгам да затрыманьня.

Сьведкамі былі заяўленыя журналістка БелаПАН Юлія Коцкая і дырэктар агенцтва Дзьмітры Наважылаў.

Паводле пратаколу, Шаўлюга нібыта прыняў удзел у пікетаваньні па праспэкце Пушкіна, 39 з мэтай выказваньня нязгоды зь дзейнай уладай. Андрэй Шаўлюга віну не прызнаў.

Ён заявіў, што яго затрымалі ў нумары гатэлю «Арбіта», дзе ён пражываў з 14 лістапада. З гэтага нумару ён вёў фота-відэафіксацыю таго, што адбывалася на вуліцы, выконваючы свае абавязкі журналіста. Зь ім знаходзіліся калегі Юлія Коцкая і Андрэй Рабчык.

У 12.30 у нумар зайшлі 3 чалавекі ў спартовых касьцюмах і масках, назваліся міліцыяй. Раней Шаўлюга меркаваў, што гэта супрацоўнікі ГУБАІК. Яны загадалі скласьці ўсю тэхніку на ложак, абшукалі. Супрацоўнікі АМАП суправодзілі Коцкую, Шаўлюгу і Рабчыка ў РУУС Маскоўскага раёну.

Там Шаўлюга ўказаў, што нязгодны са складзеным на яго пратаколам.
Шаўлюга таксама распавёў, што да моманту яго затрыманьня масавых мерапрыемстваў на праспэкце Пушкіна не было.

Шаўлюга заявіў патрабаваньне, каб былі агучаныя дадзеныя сьведкі абвінавачаньня. Ён кажа, што ў ЦІП «папрысутнічаў» на 8 судовых паседжаньнях і на ўсіх сьведкам быў адзін і той жа «зашыфраваны» супрацоўнік міліцыі. Падсудныя ў ЦІП знаходзяцца ў адным памяшканьні і могуць чуць, што адбываецца ў іншых паседжаньнях.

Судзьдзя Вольга Малашанка адмовіла, спаслаўшыся на тое, што сама выявіць асобу сьведкі. Шаўлюга настойліва пратэстуе супраць удзелу сьведкі, кажа, што той ажыцьцяўляе тэхнічнае забесьпячэньне працэсу і прысутнічаў на паседжаньні раней. Судзьдзя адмаўляе і працягвае апытваць сьведку. Той паўтарае зьвесткі абвінавачаньня з пратаколу.

Сьведка журналістка БелаПАН Юлія Коцкая пацьвярджае, што была затрыманая ў нумары гатэлю «Арбіта» разам з калегамі Андрэем Шаўлюгам і Андрэем Рабчыкам 15 лістапада падчас выкананьня журналісцкіх абавязкаў.

Суд заслухаў дырэктара ЗАТ БелаПАН Дзьмітрыя Наважылава, які пацьвердзіў выдачу Шаўлюгу рэдакцыйнага заданьня і атрыманьне ад яго фотаздымкаў ранкам 15 лістапада.

Адвакат хадайнічаў пра запатрабаваньне запісаў камэр відэаназіраньня з гатэлю «Арбіта». Судзьдзя адхіліла хадайніцтва, «ня лічыць неабходным».

Адвакат прасіў спыніць судовы перасьлед. Але судзьдзя Вольга Малашанка зноў не панадзілася і вынесла рашэньне – 15 сутак арышту.

Учора журналіста БелаПАН Андрэя Рабчыка асудзілі на 15 дзён арышту. Яго затрымалі ў нядзелю ў Менску.

Рэдактарку аддзелу спэцпраектаў Tut.by Марыю Ярому асудзілі на 13 дзён арышту. Яе затрымалі ў пятніцу 13 лістапада, калі ў Менску праходзілі ланцугі салідарнасьці ў памяць пра Рамана Бандарэнку. Марыя сказала, што ня ўдзельнічала ў акцыі, а падчас абеду выйшла на вуліцу выпіць кавы.