Дзве скаргі журналіста-фрылансера з Гомеля разгледзіць Камітэт ААН

Цягам 2018 года Толчын быў шэсць разоў пакараны адміністрацыйнымі штрафамі за супрацоўніцтва без акрэдытацыі з тэлеканалам “Белсат”, які транслюе свае перадачы па-беларуску з тэрыторыі Польшчы. Агульная сума штрафаў склала 2300 еўра.Раней падобная скарга зарэгістраваная з‑за штрафаў за 2017 год — агулам 1350 еўра.

“Штрафавалі мяне нібыта за незаконны выраб і распаўсюд прадукцыі СМІ, тым самым ствараючы перашкоды для свабоднага збору і распаўсюду інфармацыі, на што кожны грамадзянін мае права паводле нашай Канстытуцыі і міжнародных пагадненняў, якія падпісала Беларусь. Звярнуўся ў Камітэт ААН таму, што хачу, каб стаўленне дзяржавы да незалежнай журналісцкай супольнасці карэнным чынам змянілася”,— сказаў службе маніторынгу ГА “БАЖ” фрылансер Толчын.

У сваю чаргу юрыст, сябра ГА “БАЖ”Леанід Судаленка лічыць, што няма іншага шляху, апроч таго, каб з дапамогай Камітэта ААН па правах чалавекапаказаць беларускім чыноўнікам, што збор агульнадаступнай інфармацыі — гэта не тое, на што трэба прасіць дазволу ў дзяржавы.

“Беларускае чынавенства, на жаль, усё яшчэ лічыць, што акрэдытацыя журналістаў і фрылансераў— гэта дазвол на працу, а не дапамога ў іх прафесійнай дзейнасці. Пакуль не зменіцца цалкам такіпадыход, будуць і скаргі ў міжнародныя ўплывовыя арганізацыі”, — зазначае юрыст Судаленка.