Дзень народзінаў і роўна год у шклоўскай калоніі. Палітвязню Андрэю Фаміну спаўняецца 31

3 лістапада — народзіны ў Андрэя Фаміна, якога суд прызнаў рэдактарам і аўтарам артыкулаў для сеткі самвыдату «Веснікі». Яго асудзілі да 7 гадоў калоніі ва ўмовах узмоцненага рэжыму Свой 31-шы дзень народзінаў Андрэй сустракае ў шклоўскай калоніі № 17.

Палітвязню Андрэю Фаміну спаўняецца 31 год

Паводле боку абвінавачання, Андрэй Фамін каардынаваў сетку самвыдатаўскіх бюлетэняў «Веснікі», якія выходзілі ў друкаваным выглядзе ва ўсіх абласцях Беларусі пасля прэзідэнцкіх выбараў 2020 года. Следчыя даводзілі, што ён нібыта быў аўтарам тэкстаў і рэдактарам усёй сеткі «Веснікаў», якую 9 снежня 2022 года ўлады прызналі «экстрэмісцкім фармаваннем», — праз паўтара месяца пасля затрымання Фаміна. Таксама яго звінавацілі ва ўдзеле ў маршы пратэсту супраць фальсіфікацыі вынікаў прэзідэнцкіх выбараў у 2020 годзе.

21 чэрвеня 2023 года суддзя Мінскага гарадскога суда Анжэла Касцюкевіч пастанавіла лічыць Андрэя Фаміна вінаватым паводле трох артыкулаў Крымінальнага кодэкса:

• арт. 342 КК (Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх),
• арт. 361 КК (Заклікі да дзеянняў, скіраваных на прычыненне шкоды нацыянальнай бяспецы Рэспублікі Беларусь),
• арт. 361–1 КК (Стварэнне экстрэмісцкага фармавання або ўдзел у ім).

Напрыканцы верасня 2023 года Андрэя Фаміна ўнеслі ў пералік грамадзян, «якія маюць дачыненне да экстрэмісцкай дзейнасці», які складае МУС, а таксама ў спіс «тэрарыстаў», які складае КДБ.

Андрэя Фаміна затрымалі 27 кастрычніка 2022 года. Зранку да хлопца заявіліся супрацоўнікі ГУБАЗіКа і САХРа ў поўным баявым абмундзіраванні і са зброяй. Андрэя збівалі — гэта заўважна і на прымусовым «пакаяльным» відэа, якое апублікавалі на наступны дзень пасля затрымання праўладныя Telegram-каналы. У гэтым відэа, запісаным супрацоўнікамі міліцыі, Фамін прызнае, што нібыта меў дачыненне да сеткі самвыдату «Веснікі»  — абласных выданняў, якія былі дайджэстамі рэгіянальных пратэсных навін і распаўсюджваліся валанцёрамі.

Пра Андрэя вядома, што ён родам з Магілёва. Скончыў Беларускую дзяржаўную акадэмію мастацтваў. Жыў у Мінску, пэўны час працаваў капірайтарам. Незадоўга да затрымання ён казаў сваім сябрам, што піша кнігу.