Другі дзень народзінаў у зняволенні сустракае відэаператар Аляксандр Зянкоў

12 лістапада Аляксандру Зянкову споўнілася 56 гадоў. Свае 55‑я ўгодкі барысаўскі фатограф і відэааператар  сустрэў у мінскім СІЗА, а сёлетні дзень народзінаў — у магілёўскай ПК № 15.

Аляксандр Зянкоў. Фота: LinkedIn

Відэааператара-фрылансера Аляксандра Зянкова прызналі вінаватым ва ўдзеле ў экстрэмісцкім фарміраванні (частка 3 артыкула 361–1 Крымінальнага кодэкса). 30 студзеня 2024 года суддзя Мінскага гарадского суда Жанна Брысіна прысудзіла яму тры гады пазбаўлення волі з адбыццём у папраўчай калоніі ва ўмовах агульнага рэжыму.

Зварот у Вярхоўны суд з апеляцыйнай скаргай плёну не прынёс: суддзя Вярхоўнага суда Таццяна Васілевіч пакінула вырак суда першай інстанцыі без зменаў.

Аляксандра Зянкова затрымалі 22 чэрвеня 2023 года ў яго доме ў Барысаве. Сілавікі зладзілі там ператрус і забралі камп’ютарную тэхніку. Пасля гэтага відэааператара адразу павезлі ў Мінск і 10 дзён трымалі ў ізалятары часовага ўтрымання на вуліцы Акрэсціна.

Паводле слоў аднаго з ягоных сукамернікаў па ІЧУ, Аляксандр адмовіўся ад паслуг дзяржаўнага адваката і не прызнаваў ні ў чым сваёй віны. Пра крымінальнае абвінавачанне затрыманы журналіст распавядаў, што яно тычыцца ягоных відэаздымкаў, паказаных на «экстрэмісцкім» інтэрнэт-рэсурсе. Доказы гэтага нібыта знайшлі ў тэхнічным абсталяванні, якое забралі з дома падчас ператрусу.

Праз 10 дзён Зянкова перавялі ў следчы ізалятар № 1 на вуліцы Валадарскага ў Мінску. Там ён знаходзіўся да суда і яшчэ некаторы час пасля — да адпраўкі ў СІЗА пры магілёўскай турме № 4, куды Зянкова перавялі незадоўга да разгляду яго апеляцыйнай скаргі. 23 студзеня 2024 года беларуская праваабарончая супольнасць прызнала журналіста-фрылансера палітычным вязнем.

Сёлета ўвесну стала вядома, што яго накіравалі адбываць прысуджаны тэрмін на Магілёўшыну — у папраўчую калонію № 15.  6 траўня імя Аляксандра Зянкова з’явілася ў Пераліку грамадзян Беларусі, замежных грамадзян і асобаў без грамадзянства, датычных да экстрэмісцкай дзейнасці на сайце Міністэрства ўнутраных спраў Беларусі.

Хто такі Аляксандр Зянкоў

Аляксандр Зянкоў — вядомы ў Барысаве фатограф і ці не першы ў Беларусі фатограф-фрылансер. У 1998 годзе ён зарэгістраваўся прыватным прадпрымальнікам і зарабляў грошы, шукаючы сабе самастойнай працы. Ён не быў у штаце мясцовых незалежных выданняў, але рэгулярна з імі супрацоўнічаў.

Пазней апрача фота ён захапіўся і відэаздымкамі, самастойна авалодаў навыкамі працы з відэакамерай. Здымаў у тым ліку і дакументальныя стужкі, якія атрымлівалі ўзнагароды на фестывалях хрысціянскіх фільмаў і тэлепраграм «Магніфікат». У прыватнасці, у 2015 годзе журы адзначыла творчую працу пра аднаўленне царквы ў вёсцы Зэмбін Барысаўскага раёна.

У 2020‑х Аляксандр Зянкоў шмат займаўся ўласнай творчасцю — падарожнічаў, фатаграфаваў краявіды, прыродныя з’явы, птушак і помнікі архітэктуры. У снежні 2022 года ў яго адбылася персанальная фотавыстава.