«Дарагая дзяржаўная прапаганда». Адзін дзень вяшчання БТРК абыходзіцца ў 330 тысяч рублёў!

Давайце паглядзім, колькі грошай прапагандысты атрымаюць у наступным годзе з рэспубліканскага бюджэту.

Пасля 2020 года кошт «правільна пададзенай» інфармацыі значна ўзрос у вачах урада па зразумелых прычынах. Незалежныя СМІ былі знішчаныя, інфапрастору, якая вызвалілася, аддалі на водкуп тым, хто глядзіць на тое, што адбываецца з «патрэбнага» пункту гледжання. Праўда, іх фінансаванне пры гэтым (прынамсі, на рэспубліканскім узроўні) не павялічылася. Калі ў 2020‑м артыкул выдаткаў «СМІ» прадугледжваў 164,2 млн рублёў, то ў 2021‑м выдаткавалі толькі 146,5 (улічваецца бюджэт з карэкціроўкамі), а ў 2022‑м разлічвалі асвоіць 151 млн.

Сёлета на дзяржаўныя СМІ з рэспубліканскага бюджэту плануецца выдаткаваць ужо 162,4 млн. З гэтай сумы 133,6 млн пойдуць на тэлебачанне і радыё, 9,1 млн — на друкаваныя СМІ і 19,7 млн — на «іншыя» сродкі масавай інфармацыі (напрыклад, праўладныя тэлеграм-каналы і ангажаваныя YouTube-блогеры).

Калі казаць пра чэмпіёнаў па прыросце фінансавання, то бясспрэчным лідарам тут становіцца ЗАТ «Сталічнае тэлебачанне». Тэлеканал мясцовага значэння паказаў сябе за апошнія два гады адданым і лаяльным, і, мабыць, за гэта быў заахвочаны з рэспубліканскага бюджэту на 3,84 млн рублёў, што адпавядае прыросту ў 366%!!! Гэта значыць, СТВ атрымае ў 4,7 разы больш грошай, чым у 2022 годзе.

Немалы прырост і ў «Другога нацыянальнага тэлеканала», на які сёлета плануецца вылучыць 4,66 млн рублёў, што на 44% больш, чым у 2022‑м.

Тэлерадыёкампанія «Мір» часткова фінансуецца з бюджэту СНД, але, як вядома, ласкавае цяля дзвюх матак смокча, таму і з рэспубліканскага бюджэту Беларусі на дзейнасць гэтага канала вылучаецца 9,61 млн рублёў, што на 13,3% больш, чым летась.

Самы тлусты кавалак бюджэтнага пірага адкусіць Белтэлерадыёкампанія, якой сёлета плануецца вылучыць цэлых 120,5 мільёнаў рублёў. Такім чынам, адзін дзень вяшчання гэтай арганізацыі абыходзіцца падаткаплацельшчыкам у 330 тысяч рублёў!

У параўнанні з мінулым годам прырост фінансавання зусім невялікі, усяго 5%, яго відавочна не хопіць, каб пакрыць інфляцыю. Але, як мы бачым, недахоп цалкам магчыма дабраць «бонусамі», адзін з якіх мы згадалі ў пачатку допісу.

Акрамя гэтага, варта адзначыць, што немалую частку бюджэту дзяржаўных тэлеканалаў у мінулым жыцці (тым, што было да вайны ва Украіне) займалі плацяжы за трансляцыю значных міжнародных шоу і спартыўных спаборніцтваў, такіх як Чэмпіянат свету па футболе або Еўрабачанне. Цяпер усе гэтыя сродкі будуць вызваленыя, бо супрацоўнічаць з Беларуссю ніхто ў агляднай будучыні не збіраецца. А грошы можна выдаткаваць на тое, каб растлумачыць электарату, чаму ніхто не хоча з намі сябраваць і адкуль, нарэшце, на Беларусь рыхтаваўся напад.

Нагадаем, што ў гэтым допісе разглядаецца фінансаванне толькі з рэспубліканскага бюджэту. Калі рэспубліканскія тэлеканалы ў асноўным сілкуюцца з яго, то рэгіянальныя большую частку фінансавання атрымліваюць з мясцовых бюджэтаў. Кажучы пра тыя нешматлікія сферы нашай краіны, дзе заробкі не проста захоўваюцца, а стабільна растуць, варта ў ліку першых успамінаць «акулаў пяра», гаваруноў на камеру і дзятлаў клавіятуры, якія працуюць на дзяржаву.

Чытайце яшчэ: 

У Мінску пачаўся суд па справе TUT.BY

Слонімскі журналіст і літаратуразнавец Сяргей Чыгрын выйшаў на волю пасля арышту

Правительство ФРГ требует освободить Алеся Беляцкого и 1400 политзаключенных в Беларуси