Дакументальны фільм Аляксея Палуяна «Смеласць» пра пратэсты ў Беларусі трапіў у лонг-ліст кінапрэміі «Оскар»
3 снежня 2021
"Смеласць" (Courage) кваліфікаваўся на "Оскар" у катэгорыі "Лепшы дакументальны фільм". Цяпер у лонг-лісце 138 карцін. Ці трапіць стужка Аляксея Палуяна ў шорт-ліст прэміі, стане вядома ўжо 21 снежня.
— Дзякуй усім дарагім і любімым людзям, якія дазволілі пражыць жнівень 2020 разам і данесці праўду пра Беларусь на ўвесь свет, а таксама кожнаму мірнаму і вольнаму беларусу, які пераадолеў свой страх! Жыве Беларусь! — напісаў у Facebook рэжысёр Аляксей Палуян.
Фільм расказвае пра трох акцёраў беларускага Свабоднага тэатра — Марыну Юрэвіч, Паўла Гарадніцкага і Дзяніса Тарасенку (Павел і Дзяніс — удзельнікі беларускага гурта «РСП»). Яны становяцца сведкамі і ўдзельнікамі паслявыбарных падзеяў жніўня 2020 года ў Беларусі.
Прэм’ера карціны «Смеласць» адбылася на Берлінскім кінафестывалі ў 2021 годзе, яе таксама паказалі ў «дакументальных Канах» — на фестывалі IDFA у Амстэрдаме. Стужка выходзіла ў шырокі пракат больш як у 30 гарадах Германіі, Аўстрыі, Польшчы і Літвы. Цяпер фільм паказваюць у кінатэатрах ЗША.
@bajmedia
