Журналісту “Радыё Рацыя” дзявяты раз адмовілі ў акрэдытацыі ў Беларусі

Па словах журналіста, гэтым разам Міністэрства замежных спраў выбрала новую фармулёўку для абгрунтавання адмовы.

— Папярэднія разы яны спасылаліся на пункт 10 Палажэння аб акрэдытацыі журналістаў замежных СМІ, дзе паведамляецца, што акрэдытацыя не прадастаўляецца, калі раней журналіст ужо ажыццяўляў дзейнасць на карысць замежнага СМІ, не маючы акрэдытацыі.

Гэтым разам МЗС спаслалася на пункт 15.4 палажэння, дзе гаворыцца: “На працягу шасці месяцаў адмаўляць замежнаму сродку масавай інфармацыі ў акрэдытацыі журналістаў у выпадку ўстанаўлення факта выкарыстання паслуг журналістаў і (або) іншых асоб, якія не маюць акрэдытацыі”, — распавёў Парфёненка службе маніторынгу Беларускай асацыяцыі журналістаў.

Раней Парфёненка ўжо 8 раз звяртаўся па акрэдытацыю ў МЗС Беларусі і кожны раз атрымліваў адмовы. Скарга журналіста на дзеянні ўладаў чакае разгляду ў Камітэце па правах чалавека ААН.

— Наступным крокам будзе аспрэчванне гэтага рашэння ў судзе. Імаверна, гэта зробіць і дырэкцыя “Беларускага Радыё Рацыя”, бо рашэнне МЗС супярэчыць міжнародным прынцыпам, – кажа журналіст.

Парфёненка лічыць адмову ў акрэдытацыі відавочным парушэннем Канстытуцыі, якая дае права кожнаму грамадзяніна на збор, выкарыстанне і распаўсюд інфармацыі.