Журналістку Марыю Грыц аштрафавалі, але так і не адпусцілі з ІЧУ

Яе мужу ў ізалятары на Акрэсціна паведамілі, што на Марыю склалі яшчэ адзін пратакол і заўтра яе зноў будуць судзіць.

На ноч журналістка застаецца на Акрэсціна.

У Марыі — маленькая дачка. І, паводле заканадаўства, журналістку не могуць пакараць арыштам. Тым не менш яна больш за двое сутак знаходзіцца ў ізалятары.

Затрыманую 26 верасня журналістку МБХ-медыя  Анастасію Альшанскую аштрафавалі на пяць базавых велічыняў і адпусцілі з ізалятара. Пратакол па арт 23.34 КаАП.

У Горадні пасля сутак у ізалятары на волю выйшаў галоўны рэдактар партала newgrodno.by Ігар Бублікаў (Рэмзік). Учора падчас акцыі пратэсту Ігар быў затрыманы АМАПаўцамі. Ён асвячаў падзею і працаваў у камізэльцы «Прэса», сілавікі сарвалі з Ігара камізэльку, потым завялі яго ў аўтазак. На журналіста склалі пратакол па артыкуле 23.34 (Удзел у несанкцыянаваным масавым мерапрыемстве), 1 кастрычніка будзе суд.

Затрыманую ў суботу, 26 верасня, журналістку Алену Доўнар сёння так і не судзілі. Яна па-ранейшаму на Акрэсціна. У суботу пасля асвятлення жаночага маршу яна была ў Кастрычніцкім РАУС, але 28-га яе справа ў суд не паступіла. Заўтра адвакат зноў будзе дзяжурыць у судзе.

Невядомы лёс затрыманых сілавікамі журналістаў Уладзіміра Лапцэвіча (Магілёў), Артура Пагасяна (Мінск).