Журналістку-фрылансера з Гомеля Марыну Драбышэўскую пакаралі 10-суткавым арыштам

Марыну прэвентыўна затрымалі напэрэдадні разам з сябрам ГА «БАЖ» Яўгенам Меркісам супрацоўнікі міліцыі з удзелам дзяржаўтаінспектараў. «Паляванне» за імі вялося яшчэ ад пятніцы. Драбышэўская паспела напісаць на сваёй старонцы ў  Face­book, што іх вязуць у Чыгуначны райаддзел міліцыі.

Ноччу старшыня Гомельскай філіі ГА «БАЖ» Мікола Бянько разам з маці Драбышэўскай  ездзілі ў Чыгуначны РАУС, каб перадаць Марыне адзенне і ежу.

Сённня ў судзе Антаніне Драбышэўскай зрабілася кепска, калі абвясцілі пра арышт дачкі. Жанчына мае інваліднасць, ёй патрабуецца дапамога, а дачку за надуманае правапарушэнне адправілі на дзесяць сутак у ізалятар.

Марына Драбышэўская асвятляла маршы пратэсту для шэрагу СМІ, у прыватнасці, для мясцовага папулярнага партала «Моцныя навіны».

У ізалятары знаходзіцца і журналіст-фрылансер Яўген Меркіс, які таксама вёў стрымы з пратэстных маршаў у Гомелі.  Як паведаміў Службе маніторынга ГА «БАЖ» афіцыйны прадстаўнік УУС Гомельскага аблвыканкама Віталь Прыстромаў, разгляд адміністрацыйнай справы ў дачыненні Яўгена Меркіса (паводле папярэдняй інфармацыі) прызначаны на 17 верасня ў Навабеліцкім раённым судзе Гомеля.