Журналістка атрымала папярэджанне ад пракуратуры за ўдзел у відэазвароце супраць гвалту

“Маё знаходжанне ў пракуратуры цягнулася тры хвіліны: за гэты час мне зачыталі тэкст вуснага папярэждання, у якім былі пералічаныя некалькі артыкулаў з Адміністрацыйнага і Крымінальнага кодэксаў, дзе гаворка ідзе пра распаўсюд несапраўдных звестак”, — распавяла Наталля Пармон службе маніторынгу ГА “Беларуская асацыяцыя журналістаў”.

Пры гэтым сам тэкст папярэджання журналістка не атрымала, але ёй прапанавалі падпісаць дакумент.

“У адказ я напісала, што кіруюся асноўным законам у сваім жыцці — Бібліяй, таму ілжывыя звесткі не распаўсюджваю”, — дадала Наталля Пармон.

Журналістку праінфармавалі, што яна можа абскардзіць гэта папярэджанне ў абласной пракуратуры, але рэдактар brestnote.by не бачыць у гэтым сэнсу.

Раней за ўдзел у запісе гэтага ж відэазвароту вуснае папярэджанне атрымаў ад гарадской пракуратуры рэдактар “Брестской газеты” Віктар Марчук. Яго таксама афіцыйна папярэдзілі “пра адказнасць за распаўсюд непраўдзівай інфрмацыі”, але не дазволілі сфатаграфаць тэкст папярэджання.

“Мне было прапанавана яго падпісаць і я зрабіў унізе запіс, што з афіцыйным папярэджаннем не згодны”, — распавёў Віктар Марчук.

Якія менавіта словы відэазвароту з’яўляюцца “непраўдзівай інфармацыяй” ні Наталлі Пармон, ні Віктару Марчуку ў пракуратуры Брэста не патлумачылі.